Д.Дэлгэрсайхан: Хаягаас хүн хасахад гэрчилгээний эзэн нь хэн бэ гэдгийг үндэслэнэ
Иргэд өнөөдрөөс эхлэн burtgel.gov.mn хаягаар бүртгэлийн эсвэл регистрийн дугаараа нэвтэрч, оршин суугаа хаяг дээр нь ямар, ямар хүмүүс байгааг мэдэх боломжтой болсныг Улсын Бүртгэлийн Ерөнхий Газар(УБЕГ)-ын дарга Д.Дэлгэрсайхан хэлэв.
Тэрбээр "Хүүхдийн тоо нэмэгдсэн, хасагдсан байна гэдэг эргэлзээтэй мэдээлэл хэд хоног явлаа. Харин дээрх сайтаар шалгаснаар улсын бүртгэлд манай мэдээлэл ямар байна вэ гэдгийг мэдэх боломжтой.
Өрхийн мэдээллийн сан гэдэг бол тухайн иргэн өөрийнхөө хүслээр гэр бүлээ мэдээлдэг. Тэр мэдээллийн санг улсын бүртгэлийн мэдээллийн сантай андуурч, иргэд бухимдах тохиолдол их гарлаа" гэв.
Хэрэв таны хаяг дээр танихгүй хүмүүс бүртгэгдсэн байвал тус сайтаар дамжуулж, тайлбар мэдээлэл, холбоо барих утсаа үлдээх юм байна. Ингэснээр бүртгэлийн ажилтнууд хариу арга хэмжээг шуурхай авна гэдэг УБЕГ-ын дарга Д.Дэлгэрсайхан хэллээ.
Мэдээллийн үеэр сэтгүүлч түүнээс "Иргэний хаяг дээр өөр хүмүүс бүртгэлтэй байлаа гэж бодоход, тухайн хүн албан ёсоор хаягаараа амьдарч байгаа хүмүүсийг манайх биш гээд хаягаас нь хасуулах хүсэлт гаргавал яах вэ. Нэг хаяг дээр бүртгэгдсэн байгаа иргэдийн үндсэн хаяг дээр байгаа болон түр оршин суугаа хүмүүсийг яаж ялгах вэ?" гэж асуув.
Уг асуултад тэрбээр "Хаяг бол үл хөдлөх хөрөнгийн хаяг. Тиймээс үл хөдлөх хөрөнгийн эзэмшигч нь тухайн хаягийн жинхэнэ эзэн нь. Хаягаас хасалт хийхэд заавал нотлох баримтыг нь шалгадаг. Гэрчилгээний эзэн нь хэн бэ гэдгийг үндэслэж улсын бүртгэлийн шийдвэр гарна. Таны хаяг дээр өмнө нь амьдарч байсан айлын хүн хаяг дээрээ үлдчихээд өнөөдөр тантай холбоотой гомдол гаргавал албан ёсны хаягийг солих эрхтэй этгээд биш байна гэдэг хариу өгнө" гэж хариуллаа.
Нэмэлт мэдээлэл хүргэхэд, УБЕГ жилд 200-220 мянга хаягийн бүртгэл хийдэг байна.
ВИДЕО:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
