Өнөөдөр /2021.02.11/ өглөөний 06:00 цагаас эхлэн 12 хоногийн хугацаанд Гамшгаас хамгаалах бүх нийтийн бэлэн байдлын зэрэгт шилжин ажиллаж буй.
Энэ хугацаанд иргэд зорчигчдын хөдөлгөөнийг 90 хүртэл хувь хязгаарлаж, цар тахлын тархалтын голомтыг хумих, халдвар тээгчийн ойрын болон дам хавьтлыг олж тусгаарлан эмчлэх зорилгоор “Нэг хаалга-Нэг шинжилгээ” нэгдсэн арга хэмжээг зохион байгуулж, эхний ээлжинд голомтот бүсийн өрх бүрээс нэг хүнийг шинжилгээнд хамруулж байгаа юм. Өдрийн 15.00 цагийн байдлаар 40 мянган иргэн ковидын шинжилгээнд хамрагджээ.
Бүх нийтийн бэлэн байдлын эхний өдөр Шадар сайд, УОК-ын дарга С.Амарсайхан хөл хорионы хязгаарлалтад авч хэрэгжүүлж буй зарим арга хэмжээг газар дээр нь шалгаж, Сүхбаатар дүүргийн 14 дүгээр хороо, Чингэлтэй дүүргийн 9, 10 дугаар хороодод ажиллав. Энэ үеэр хэв журам сахиулахаар ажиллаж буй төрийн албан хаагчид, түлш борлуулагч, иргэдийн төлөөлөлтэй уулзаж, хөл хориотой холбоотой тулгарч буй асуудлуудыг тодруулсан юм.
Тус дүүргүүдэд ажиллаж буй албан хаагчдын зүгээс зөвшөөрөгдсөн 14 байгууллагын ажилтан, албан хаагчид болон эмнэлгийн яаралтай тусламж үйлчилгээ яаралтай авах гэж буй хүмүүсийн бичиг баримтыг үндэслэн хувийн автомашинтайгаар зорчуулж байна.
Гэвч зарим иргэд тавьсан шаардлага биелүүлэхгүй, тухайн ажилладаг байгууллагынхаа тодорхойлолтгүй, бичиг баримт бүрдүүлэлт дутуу, эмнэлэгт үзүүлэх нэрийдлээр худал ярих тохиолдол гарч байгаа учраас зайлшгүй бичиг баримтыг шалгаж байгаа талаар хэллээ.
Шадар сайдын зүгээс эмнэлгийн яаралтай тусламж үйлчилгээг авах шаардлагатай болон ажлын үнэмлэх, албан байгууллагын тодорхойлолттой, зөвшөөрсөн 14 байгууллагын албан хаагчид, ажилчдыг хувийн машинаар зорчиход саад учруулахгүй байхад анхаарч ажиллахыг үүрэг гүйцэтгэж буй албан хаагчдад сануулсан юм.
Тэрбээр бэлэн байдлын зэрэгт шилжсэн үеийн нөхцөл байдлыг шалгаж дуусаад, албан өрөөндөө УОК-ын Шуурхай штабын ажлын хэсгийг хуралдуулав.
Иргэдийн зүгээс гаргасан гомдол, санал дайчилгаанд хамрагдан ажиллаж буй төрийн албан хаагчдад тулгарсан асуудлыг шийдвэрлэх үүргийг холбогдох албаныханд өглөө.
Мөн байгууллага хоорондын ажлын уялдааг сайжруулж, УОК-оос гаргасан бодлого шийдвэрийг шат шатны байгууллагууд шуурхай хэрэгжүүлж ажиллахыг онцлоод дараах үүргийг өглөө. Үүнд:
Цаашид хариуцсан ажилдаа эзэн байж шуурхай ажиллах, өмнөх алдааг давтахгүй байхыг анхааруулжээ.