Л.Оюун-Эрдэнэ: Төрийн өмчит үйлдвэрийн газруудын хэмнэлтийг байж болох эцсийн цэгт аваачна

Гэрэл зургийг MPA.mn

Ерөнхий сайд Л.Оюун-Эрдэнэ Засгийн газраас хэрэгжүүлэх 10 их наяд төгрөгийн хөтөлбөрийг танилцуулахдаа шударга ёс цахим засаглалыг хэрэгжүүлнэ гэдгийг онцолсон. 

Энэ хүрээнд дэлхийн зах зээлд гарч буй стартаппуудыг дэмжинэ гэдгээ илэрхийллээ. Мөн төрийн өмчит компаниудын хэмнэлтийг дээд цэгт нь хүргэхээ мэдэгдэв.

Тэрбээр "Үүнийг төр дангаараа хийхгүй. Хувийн хэвшилтэй хамтарч ажиллана. Хувийн хэвшлийг дангаар нь ажиллахад бодлогын дэмжлэг үзүүлнэ.

Засгийн газрын хувьд 62 төсөл гаргасан. Хувийн хэвшлүүдтэй хөл хорио суларсны дараа хэсэгчилсэн уулзалтууд хийнэ. Энэ тал дээр төр ямар нэгэн хүнд сурталгүйгээр нээлттэй хуулийн хүрээнд хамтарч ажиллана.

Энэ чиглэлийн 100 төслийг бид зарлана. Эдийн засгаа сэргээх 10 их наяд төгрөгийн хөтөлбөрт улсын төсвөөс мөнгө гарахгүй бөгөөд зөвхөн зохицуулалтууд хийгдэнэ. Ихэнх нь Монголбанкны эх үүсвэр, баялгаа зөв зохистой ашиглах менежментүүд юм. Төсвийн байгууллагуудыг хэмнэлтийн горимд шилжүүлж байгаа. Тэр дундаа төрийн өмчит үйлдвэрийн газруудыг цалин хангамж болон бусад асуудлаар хэмнэж болох эцсийн цэг дээр аваачна. Үүнээс гарч байгаа мөнгөн урсгалыг өөрсдийн гаргасан төлөвлөгөө рүү оруулна" гэдгийг мэдэгдлээ.