"Тусгаарлах байрны дэг журмын талаар УОК тусгайлан авч хэлэлцсэн. Ярих асуудлууд байгаа"

Гэрэл зургийг MPA.mn

Улсын Онцгой Комиссын Шуурхай штабаас цаг үеийн асуудлаар мэдээлэл хийж байна. 

ШУУД ҮЗЭХ: 

Улсын Онцгой комиссын өчигдөр болсон ээлжит 25 дугаар хурлаар Гамшгаас хамгаалах өндөржүүлсэн бэлэн байдлын хугацааг сунгах саналыг оруулсан гэдгийг Шуурхай штабын дарга, хурандаа Б.Ууганбаяр хэллээ. Учир нь 

1. Өмнөд болон хойд хөрш дэх коронавирусийн нөхцөл байдал, Монгол Улсын хил дагуух аймаг, мужуудын нөхцөл болон дэлхийн улс орнуудын цар тахлын нөхцөл байдлыг үндэслэсэн 
2. ЭМЯ, ХӨСҮТ зэрэг холбогдох мэргэжлийн байгууллагуудын салбар дундын ээлжит үнэлгээгээр Монгол Улс өндөр эрсдэлтэй байна гэж үнэлснийг үндэслээд 

Гамшгаас хамгаалах өндөржүүлсэн бэлэн байдлыг долдугаар сарын 15-ныг дуустал сунгасныг тэрбээр мэдээллийн эхэнд дурдлаа.

Шуурхай штабаас 2020 оны нэгдүгээр сарын 1-нээс хойш 26 удаагийн захиалгат нислэгийг зохион байгуулаад байна. Энэ хугацаанд 

• агаараар 5,916
• авто зам болон явганаар 5,588 иргэнийг татан авсан. 

Нийт дүнгээрээ 11,504 иргэнийг холбогдох мэргэжлийн байгууллагуудын хяналт дор татан аваад байна. 

Зургаадугаар сард 10 удаагийн нислэгээр иргэдээ татан авах ажлыг зохион байгуулж, 2,358 иргэн эх орондоо ирсэн. 

Ийнхүү УОК-оос гадаадад байгаа иргэдээ татан авах ажлыг өргөн хүрээнд зохион байгуулж байгаа. 

Одоогийн байдлаар

• Улаанбаатар хотод 27 байршилд 2,316 хүн тусгаарлах байранд байна. 
• Орон нутагт гурван цэгт 242 хүн байгаа. 

Нийт дүнгээрээ 2,558 иргэн тусгаарлах байранд байгаа бол гэрийн ажиглалтад 664 хүн шилжээд байна. Гэрийн ажиглалт 14 хоног үргэлжлээд тухайн хүн энгийн амьдралын хэмнэлдээ шилжиж байгаа. 

Тэрбээр энэ талаар "Тусгаарлах хоногийг ЭМЯ, ХӨСҮТ, мэргэжлийн байгууллагаас тайлбарлаж байгаа. Тусгаарлах байрны хувьд Шуурхай штабаас нөхцөл байдалтай уялдуулан шийдээд явж байна. Хүндрэлтэй нөхцөл байгаа. Тусгаарлах байрны дэг журмын талаар удахгүй дэлгэрэнгүй мэдээлэл өгнө. Энэ асуудлыг өчигдрийн УОК-ын хурлаар тусгайлан авч хэлэлцсэн. Ярих асуудлууд байгаа" гэлээ.