2019/08/23
Америк доллар
МОНГОЛ БАНК:
2,672.82₮
B30
УЛААНБААТАР
23°
|
13°
B30
УЛААНБААТАР
17°
|
11°
B30
УЛААНБААТАР
16°
|
01:00
S29
13°
02:00
S29
12°
03:00
S26
11°
04:00
S26
10°
05:00
S26
10°
06:00
S26
10°
07:00
S26
11°
08:00
S26
12°
09:00
S30
13°
10:00
S30
16°
11:00
S32
18°
12:00
S32
20°
Энэ мэдээ хуучирсан буюу 2019/05/03 -нд нийтлэгдсэн мэдээ болно.

Охид олдоогүй л байна

О.Дашням, Өдрийн сонин
2019 оны 5 сарын 3
Өдрийн сонин

Бага насны хүүхэд, тэр дундаа өсвөр үеийн охид ор сураггүй алга болсон ноцтой хэрэг сүүлийн гурван жилд хэд хэд бүртгэгдлээ. Охид хөл хөдөлгөөнтэй нийслэл хотод бус хөдөө орон нутагт алга болж байгаа нь хачирхалтай.

Монгол орны урд хэсгийн дамжин өнгөрөх томоохон суурин Дорноговь аймгийн Замын-Үүд сумаас 2017 оны аравдугаар сарын 2-ны өдөр II сургуулийн гуравдугаар ангийн сурагч, найман настай Д.Сэржмядаг 12:00 цагийн үед хичээлдээ явахаар гэрээсээ гараад сураг тасарсан. Охин хамгийн сүүлд 12:30 цагийн орчимд ээжийнхээ утас руу дөрвөн удаа залгасан боловч ээжийнх нь утасны цэнэг дуусаж ярьж чадаагүй аж.

Хэсэг хугацааны дараа ээж нь охин руугаа залгахад охины утас холбогдохгүй байсан гэдэг. 16:30 цагийн орчимд Д.Сэржмядагийн эгч Д.Ариунзаяа ээж рүүгээ ярьж “Ээжээ дүү алга болчихсон байна. Сургууль дээрээ очоогүй гэнэ. Гэртээ алга байна” гээд уйлсан байна. Охины ар гэрийнхэн эрэл сурал болж өдрийнхөө 18:00 цагт орон нутгийн цагдаагийн байгууллагад мэдэгджээ.

Цагдаагийн байгууллагаас охиныг алга болдог өдөр Замын-Үүдээс БНХАУ-ын Эрээн хот руу хил гарсан иргэдийн судалгааг Хилийн мэргэжлийн хяналт, гаалийн ажилтнуудаар гаргуулж, шалгасан ч ямар нэгэн сэжүүр олоогүй. Охин алга болох үеэр 500 гаруй хүний бүрэлдэхүүнтэй ажлын хэсэг гарч Замын-Үүдийн айл бүхний булан тохойг нэгжсэн ч сургийг нь гаргаагүй. Сумын төвөөс 15 км-ийн радиуст самналт хийж үзсэн ч амжилтад хүрээгүй. Одоо улс орон даяар эрлийн ажиллагааг үргэлжлүүлж байгаа ч сайн мэдээ дуулалгүй хоёр жил орчим болсон байна. 

Охиныг эрэн хайх эрлийн багийнхан өнөөдөр ч татан буугдаагүй. Энэ хэрэгт холбогдуулан гурван хүнийг сэжигтнээр татан шалгасан ч сэжүүр олдоогүй юм.

Д.Сэржмядаг охины сураг гараагүй байхад Монгол орны хойд бүсийн дамжин өнгөрөх томоохон суурин газар Сэлэнгэ аймгийн Жавхлант сумаас дөрөвдүгээр сарын 14-ний өдрийн 18:00 цагийн үед ЕБС-ийн гуравдугаар ангийн сурагч Бибишийн Ундармаа охин гэрийнхээ хажуугийн тоглоомын талбайд тоглож байгаад алга болсон нь нийгмийг цочроолоо. Алга болсон даруйд эцэг эх нь сумын бүх айлуудаар сураглаж яваад ололгүй 20:00 цагийн орчимд хэсгийн төлөөлөгчид мэдэгдсэн байна.

Хэсгийн төлөөлөгч тухайн өдрийн 00:00 цаг хүртэл эрлийн ажиллагаа явуулаад сумын Засаг даргад мэдэгджээ. Улмаар нийслэл болон аймаг орон нутгийн цагдаагийн албан хаагчид хүч нэмэгдүүлж орон нутгийн иргэдтэй хамтарч эрлийн ажиллагааг явуулсан байна. Сумын ойролцоох 10 км-ийн орчимд зургаан удаагийн эрэн хайх ажиллагааг зохион байгуулсан тухай мэдээллийг сумын цагдаагийн хэлтсээс хийсэн юм.

Дорноговийн Замын-Үүд, Сэлэнгийн Жавхлант гэх газрууд бол урагш, хойш хил гарахаар явж буй хэн бүхний зам дээр байршдаг түм түчигнэж, бум бужигнадаг манай орны томоохон суурингууд. Замын-Үүд сум Улаанбаатар хоттой засмал болон төмөр замаар холбогдож, урд талаараа БНХАУ-тай хил залгадаг. Харин Сэлэнгэ аймгийн Жавхлант сум Дархан-Уул аймгаас 36 км, засмал замаас зургаан км, төмөр замаас 15 км-ийн зайтай их хөлийн газар юм. Улаанбаатартай төмөр замаар холбогддог суурин. Алтанбулагийн боомт руу зүглэсэн бүхний улаан зам дээр л Жавхлант сум бий.

Охид сураггүй алга болсон суурингууд бол ийм л хөл хөдөлгөөнтэй, ямар ч атгаг хорон санаатан явж байх эрсдэл өндөртэй газар. Охидыг хааш нь ч авч явсан байх боломжтой.

Энэ сарын 1-ний өдөр Сонгинохайрхан дүүргийн зургаадугаар хорооны нутаг дэвсгэрт дөрөвдүгээр сарын 29-ний орой 23:00 цагийн орчим насанд хүрээгүй хүүхэд үл таних хүнд хүчирхийлүүлсэн гэмт хэргийн сэжигтнийг тус хэлтсийн Эрүүгийн цагдаагийн тасгийн алба хаагч нар саатуулжээ. 11 настай охиныг хүчирхийлсэн С.Т гэх этгээд сураг алдраад буй Б.Ундармаа охиныг ууланд аваачиж булсан гэж мэдүүлжээ.

Энэ талаар ЦЕГ-ын Хүүхдийн гэмт хэргээс урьдчилан сэргийлэх тасгийн дарга, цагдаагийн хошууч Д.Будзаанаас тодруулахад "Охиныг нас барсан талаарх мэдээ батлагдаагүй, тодорхой ирсэн мэдээлэл алга байна. Одоогийн байдлаар охиныг хайх ажиллагаа үргэлжилж байна” гэж хэлсэн юм. Энэ хэрэг мөрдөн байцаалтын шатанд явж байгаа гэнэ.

Алга болсон охидынхоо сургийг гүйцэд гаргаагүй байхад Хөвсгөл аймгийн Рашаант сумын дунд сургуулийн дотуур байранд амьдарч байсан 11 настай охин сураггүй алга болсон гэх бараан мэдээ дахиад л сонсогдох нь тэр.

Рашаант сумын Цэнгэл багт тус сумын харьяат иргэн Б-гийн охин 11 настай X... сурагчдын дотуур байрнаас дөрөвдүгээр сарын 30 буюу мягмар гаригийн 19:00 цагийн орчимд гараад сураггүй болжээ. Энэ сарын 1-ний өдөр охиныг хайхаар тус сумын Цагдаагийн хэсгийн төлөөлөгчөөр ахлуулсан орон нутгийн 80 иргэн явганаар хайсан ч олоогүй байна. Улмаар аймгийн Онцгой байдлын газрын алба хаагчид хүч нэмэгдүүлж, аймгийн Цагдаагийн газрын алба хаагчид хамтран Рашаант сумын чиглэлд эрэн хайх ажиллагааг үргэлжлүүлжээ.

Харин энэ сарын хоёрны өдөр алга болсон охиныг 16:00 цагийн орчимд олсон сайн мэдээ дуулдлаа. Охин Рашаант сумын Цэнгэл багийн айлд байсныг нутгийн иргэн харж, ар гэрийнхэнд нь хэл дуулгасан байна. Энэ талаар охины ээж Э.Мөнхцэцэг “Охин маань олдчихлоо. Нутгийн эмээгийнд ирсэн байжээ. Тэр айлд байсныг нутгийн иргэн хараад хэлж өглөө” гэж мэдэгджээ.

Сураггүй болсон Б.Ундармаа охиныг ууланд аваачиж булсан гэж мэдүүлж байгаа этгээд ямар ч хэрэг хийсэн байж болзошгүй. Өөр нэг ийм этгээд хоёр жилийн хугацаанд сураг нь гараагүй Д.Сэржмядаг охиныг элсэнд булчихсан ч байж болно. Охидыг хулгайлж эцэг эхийг нь шар махтай нь хатааж байгаа новшнуудад цаазын ял ч шагнал болно. Бузар хэрэг хийсэн этгээдүүд зовохын шаналал мэдрэлгүй орчлонгоос явна гэдэг шударга бус.

Амар амгалан хөдөө сууринд аж төрдөг ч хүүхдээсээ хараагаа хором ч салгалгүй харахгүй бол амьдын тамд унахад ойрхон цаг иржээ. Атгаг санаатан таны хажууд л алхаж явна. Эцэг эх, асран хамгаалагч нь маш анхааралтай байх ёстой болжээ.

x