К-поп хамтлаг анх удаагаа НҮБ-ын индэр дээрээс үг хэлнэ
Сүүлийн үед өрнөдөд алдар нэрээ дуурсгаж байгаа Өмнөд Солонгосын BTS хөвгүүдийн хамтлагийнхан ЮНИСЕФ-ийн хэрэгжүүлж байгаа “Generation Unlimited” хүүхэд залууст чиглэсэн төслийг дэмжиж байгаагаа илэрхийлэн НҮБ-ын индэр дээрээс гурван минутын хугацаанд үг хэлэхээр болжээ.
Дараа нь тэд амьд тоглолт үзүүлэхээр болсон байна.
Даваа гарагт (өнөөдөр) Нью Йорк хот дахь НҮБ-ын төв байранд болох энэ арга хэмжээнд Өмнөд Солонгосын ерөнхийлөгч Мүүн Жэ Ин, НҮБ-ын ерөнхий нарийн бичгийн дарга Антониу Гутерреш нар оролцох гэнэ.
Энэ нь К-поп урлагийнхан анх удаа НҮБ-ын төв байранд үг хэлсэн тохиолдол болох юм.
Өмнө нь 2017 оны арваннэгдүгээр сард Өмнөд Солонгосын уран гулгалтын тамирчин Ким Юн А Пёнчаны Өвлийн Олимпийн талаар НҮБ-д үг хэлж байжээ.
“Generation Unlimited” бол 10-24 насны хүүхэд залууст боломж олгох, хөрөнгө оруулахыг дэмжсэн дэлхийн хэмжээний төсөл юм.
Эх сурвалж: Korea Times
