2018 оны эхний 2 сард улсын хэмжээнд 723 объектын гал түймэр гарч, 7.9 тэрбум төгрөгийн хохирол учирчээ
2018 оны эхний 2 сард улсын хэмжээнд объектын гал түймэр нийт 723 удаа гарч, 7.9 тэрбум төгрөгийн хохирол учирч, 14 хүн нас барж, 12 хүн түлэгдэж гэмтэн, 319 гэр, орон сууц шатсан байна. Дээрх гал түймрийн аюулаас аврагч-гал сөнөөгчид 173 хүний амь нас, төр, аж ахуйн нэгж, байгууллагын 13.4 тэрбум төгрөгийн өмч хөрөнгийг авран хамгаалжээ.
Объектод гарсан гал түймрийг өнгөрсөн оны мөн үетэй харьцуулахад гал түймрийн тоо 17.0 хувиар өсөж, учирсан хохирлын хэмжээ 68.3 хувиар өссөн байна.
Нийслэл хотод нийт 471 удаагийн гал түймэр гарч, 0.8 тэрбум төгрөгийн хохирол, орон нутагт 252 удаагийн гал түймэр гарч, 7.1 тэрбум төгрөгийн хохирол тус тус учирсан байна.
Объектын түймрийн шалтгаан:
- Пийшин, зуух, яндангийн цонолтоос 265 гал буюу 36.1 хувь,
- Ил задгай гал, асгасан үнс нурмаас 137 гал буюу 18.7 хувь,
- Цахилгаанаас 101 гал буюу 13.8 хувь,
- Бусад шалтгаанаас 90 гал буюу 12.3 хувь,
- Машин техникийн гэмтэл ашиглалт буруугаас 62 гал буюу 8.4 хувь,
- Шалтгаан тогтоогдоогүй 27 гал буюу 3.7 хувь,
- Лаа, дэн, тамхи, шүдэнзний галаас 17 гал буюу 2.3 хувь,
- Гагнуур, паялник, бамбараас 13 гал буюу 1.8 хувь,
- Хүүхдийн болгоомжгүй үйл ажиллагаанаас 6 гал буюу 0.8 хувь,
- Архидан согтуурснаас 5 гал буюу 0.7 хувь,
- Машин, техникийн яндангийн цонолт, оч болон цахилгааны очноос 5 гал буюу 0.7 хувь,
- Санаатай үйлдлээр 3 гал буюу 0.4 хувь,
- Тэсрэлт дэлбэрэлт ослоос 2 гал буюу 0.3 хувь байна.
Урьдчилан сэргийлэх, хяналт шалгалт:
Улаанбаатар хотод болон орон нутгийн хэмжээнд шинээр баригдах барилга байгууламжийн 73 зураг төсөлд хяналт хийж баталгаажуулан, барилга байгууламжийг байнгын ашиглалтад хүлээж авах улсын комиссын бүрэлдэхүүнд 102 удаа орж ажиллажээ.
Эх сурвалж: Онцгой Байдлын Ерөнхий Газар
