Дональд Трамп: Ким Жон Ун бол гарцаагүй солиотой хүн!

АНУ-ын ерөнхийлөгч Дональд Трамп, Хойд Солонгосын удирдагч Ким Жон Ун хоёрын хэрүүл үргэлжилсээр байна.

НҮБ-ын индэр дээрээс Трамп Хойд Солонгосыг сүрдүүлж, Ким Жон Уныг "Пуужинтай хүн" гэж хочилсны дараа Хойд Солонгосын удирдагч Трампыг "сэтгэцийн өвчтэй", "зөнөсөн хөгшин", "айсан нохой" зэргээр доромжилсон мэдэгдэл гаргасан юм.

Тэгвэл хэдхэн цагийн өмнө Дональд Трамп түүнд мөн хариу барьжээ. Тэрээр твиттер хуудсандаа "Хойд Солонгосын Ким Жон Ун бол ард түмнээ өлсгөж, алж хядахыг ч тоодоггүй, гарцаагүй солиотой хүн. Түүнийг шалгуулбал зохино!" гэж бичсэн байна.

Хойд Солонгосыг төлөөлж НҮБ-ын ерөнхий ассамблэйн чуулганд оролцож байгаа гадаад хэргийн сайд Ри Ён Хо өнөөдөр илтгэл тавих юм. Тэрээр Нью Йорк хотод ирмэгцээ Трампын илтгэлийг "нохой хуцах"-тай адилтгаж, Вашингтоны сүрдүүлгийн хариуд тус дэглэм Номхон далайд устөрөгчийн бөмбөг туршиж болзошгүй гэж хэлсэн нь дэлхий нийтийн анхаарлыг татаад байгаа.

НҮБ-ын чуулганы танхимд түүний хэлэх үг мөн л Вашингтон-Пёньяны сөргөлдөөнийг хурцатгах нь дамжиггүй.