Шахмал түлш хэрэглэж эхэлсэн жилээс хойш угаарын хийн цочмог хордлого даруй 50 дахин өсжээ
Улаанбаатарчууд дулаан өвөлжихийн тулд гэртээ нүүрс түлэхээ больж, шахмал түлш хэрэглэсээр даруй ТАВАН ЖИЛийг ардаа үдлээ.
2019 оноос хойш утааг арилгах "түлшний" шийдэл хэрэгжив. Энэ хугацаанд юу өөрчлөгдөж, ямар үр өгөөжийг та бидэнд өгсөн бэ?
График1: Угаарын хийд хордсон тохиолдол (2017-2023)
Сүүлийн долоон жилийн хугацаанд угаарын цочмог хордлогын тохиолдол 9,009 бүртгэгдэж, 103 хүн амь насаа алдсаныг Хүний Эрхийн Үндэсний Комисс (ХЭҮК)-оос мэдээлсэн.
Улсын хэмжээнд 2017-2023 оны байдлаар угаарын хийн хордлогын тоон мэдээлэлд Нийгмийн Эрүүл Мэндийн Үндэсний Төв (НЭМҮТ)-ийн судлаачид дүн шинжилгээ хийжээ.
Тус дүн шинжилгээнд дурдсан онцлох мэдээллийг тоймлон хүргэе.
Угаарын хийн хордлогын 7,471 тоон мэдээлэлд боловсруулалт хийсэн байна. Тандалтын тоон мэдээллээс харахад угаарын хийн цочмог хордлого жил ирэх тусам өсөх хандлагатай байгаа юм.
2019 онд сайжруулсан түлш хэрэглэж эхэлсэнтэй холбоотой тохиолдлын тоо ихсэж, тандалт сайжирсныг дурджээ.
Угаарын хийн цочмог хордлогод өртсөн иргэдийн дундаж нас 24-25 байсан.
- Хамгийн өндөр нас 110
- Хамгийн бага нас 5 хоногтой нярай угаарын хийн хордлогод өртсөн байна.
Биеийн ерөнхий байдал хөнгөн гэж эрэмбэлэгдсэн тохиолдолд гэртээ эмнэлгийн тусламж авч үлдсэн.
Харин дунд, хүндэвтэр эрэмбэлэгдсэн иргэдийг түргэн тусламжаар эмнэлгийн байгууллага руу шилжүүлсэн бөгөөд нас баралтын тохиолдлыг авч үзвэл 93 хувь нь гэрийн нас баралт ба эмнэлгийн тусламж үйлчилгээ авч чадахгүй амь насаа алдсан байна.
График2: Хордлогод өртсөн иргэдийн биеийн байдал (2023)
Тандалтаар 2022 онд нас баралтын нэг тохиолдол бүртгэгдсэн бол 2023 оны эхний гурван сарын байдлаар 21 тохиолдол байна.
Хүснэгт1: Угаарын хийн цочмог хордлого байршлаар (2023)
| Дүүрэг | Тоо | Хувь |
|---|---|---|
| Баянгол | 38 | 6.7 |
| Баянзүрх | 90 | 15.87 |
| Налайх | 2 | 0.35 |
| Сүхбаатар | 39 | 6.88 |
| Сонгинохайрхан | 237 | 41.8 |
| Хан-Уул | 28 | 4.94 |
| Чингэлтэй | 133 | 23.46 |
Угаарын хийд хордож амь насаа алдсан тохиолдлууд
Улсын хэмжээнд нийт 2,568 хүн угаарын хийд хордож. эмнэлгийн байгууллагаас тусламж үйлчилгээ авчээ. Үүнээс
- Насанд хүрсэн 1,435 хүн
- 1,133 хүүхэд байна.
Угаарын хийд хордсон нийт 2,568 иргэнээс 15 хүн (8 хүүхэд, 7 том хүн) нас баржээ.
2019.10.05-2020.04.012021 оноос эхлэн угаарын хийд хордсон иргэдийн мэдээллийг авч байгаа.
Энэ хугацаанд нийслэлд 1,600 гаруй хүн угаарын хийн хордлогоор эмнэлгийн тусламж, үйлчилгээ авсан.
2021 ондЭнэ онд угаарын хийн 457 дуудлага мэдээлэл бүртгэгдэж, үүнээс хүний амь нас хохирсон 26 тохиолдол бүртгэгдсэнийг цагдаагийн байгууллагаас мэдээлж байсан.
2022 ондЭнэ хугацаанд 2,679 иргэн угаарын хийн хордлогод өртөж, 57 иргэн нас барсан харамсалтай мэдээлэл байна.
Энэ хугацаанд 1,192 иргэн угаарын хийн хордлогод өртөж, 22 иргэн нас баржээ.
2024 оны нэгдүгээр сараас тавдугаар сарын 4
" Угаарын хийн төхөөрөмж таны амь насыг аврах том хэрэгсэл гэдгийг дахин дахин захья"
Угаарын хийн хордлогын гол шалтгаан ба урьдчилан сэргийлэлтийн талаар НЭМҮТ-ийн Хор судлалын шуурхай удирдлагын албаны дарга Б.Баттүвшинтэй ярилцсан юм.
Тэрбээр хэлэхдээ "Манай улс -40 градусаас +40 хүртэл халдаг хуурай амьсгалтай.
Өвлийн улиралд түлш түлэх зайлшгүй шаардлага бий. Сүүлийн долоон жилийн хугацаанд 7,100 гаруй хүн угаарын хийн хордлогод өртсөн гэх тоон мэдээ гарсан.
Анхаарах шаардлагатай хэд хэдэн асуудал байна. Тухайлбал
- Яндангаа хөөлөөгүй,
- Яндангийн сойлтыг хаасан,
- Мэдрэгч тоног төхөөрөмж байхгүй,
- Зуухны битүүмж алдагдсан,
- Галлагааны дэс дараалал алдагдсан зэргээр цочмог угаарын хийн хордлого бүртгэгджээ.
Иргэдийн зүгээс "Тог их иддэг", "Муухай дуутай" гэх шалтгаанаар угаарын хийн мэдрэгч төхөөрөмжийг салгачихдаг. Яг үнэндээ энэ төхөөрөмж утас цэнэглэхээс ч бага тог иддэг. Тиймээс 24 цагийн турш тасралтгүй ажиллуулахыг зөвлөе.
Нийт 10,000 хүн амаар тооцвол 225 хүн угаарын хийн улмаас нас барсан байна.
Хот төлөвлөлттэй холбоотойгоор Улаанбаатарт угаарын хийн хордлого хөдөө орон нутгийнхаас илүү бүртгэгдэж буй. Өөрөөр хэлбэл 3.5 сая хүн амын 1.5 сая нь нийслэлд төвлөрч амьдарч байна. Үүний зэрэгцээ гэр хороолол зонхилсон байдаг тул хордлогын тоо бусад аймгуудаас өндөр гарч буй" гэв.
Шахмал түлш угаарын хийн хордлогын гол шалтгаан болж байна уу?
Энэ талаар тодруулахад "Нягтаршуулж, угаагаад гаргасан түлшийг хэлж байгаа. Түүхий нүүрс гаднын ямар нэгэн хольцтой байдаг.
Хэрвээ хувцас нь хиртэй байвал заавал угаалгын нунтгаар угааж арилдаг. Харин шахмал түлш нь гаднах бохирдлыг нь аваад цэвэрлэсэн буюу шахмал нүүрс төрөгч болж байгаа юм. Хорт нөлөөгөөрөө түүхий нүүрс илүү.
Шахмал түлш түлж байгаа учраас зуухаа солих шаардлагатай. Яагаад гэвэл энэ төрлийн түлш өндөр температурт халж, дулаанаа барих зориулалттай.
Цочмог хордлогод өртөхөд
- толгой эргэх
- бөөлжих
- гар салгалах зэрэг шимж тэмдэг илэрнэ.
Тухайн хүний бие физиологиос хамаараад харилцан адилгүй. Дээрх шинж тэмдэг ажиглагдаж байгаа бол яаралтай түргэн тусламжид хандаарай. Мөн халуун бүлээн ус уух, цэвэр агаарт гарч, эх үүсвэрээс хол байх шаардлагатай.
Угаарын хийн төхөөрөмж таны амь насыг аврах том хэрэгсэл гэдгийг дахин дахин захья" хэмээв.
Улаанбаатар хотын 50-69 насны эрчүүд зүрх судасны өвчний улмаас нас барах эрсдэл өндөр байгааг анхааруулав
Б.Цэцэгсайхан: Умайн хүзүүний хавдрын вакцинжуулалтыг эсэргүүцсэнээр 4,000 гаруй эмэгтэйг өвдөхөөс сэргийлж, амь насыг нь аврах боломжийг алдсан
Бирагийн Аръяа: Монгол хоол үнэхээр сайхан. Гэхдээ байнга идвэл урт наслахад хэцүү
Д.Оюунзул: Хүнд тоотой хэдэн сонсголын сормууслаг эс бий. Чихэвчний хэт хэрэглээ эдгээрийг гэмтээснээр сэргэшгүй дүлий болгох эрсдэлтэй
Мария Габриелла Бреглия: Монгол Улсад гэр бүлийн орлого хангалтгүй учраас хүүхэд хөдөлмөр эрхэлсэн хэвээр байна
