2019-2020 оны өвөл нийт 2,568 хүн угаарын хийнд хордож эмнэлгийн тусламж авжээ
2019 оны аравдугаар сарын 5-ны өдрөөс 2020 оны дөрөвдүгээр сарын 1-нийг хүртэлх хугацаанд улсын хэмжээнд нийт 2,568 хүн угаарын хийнд хордож эмнэлгийн байгууллагаас тусламж үйлчилгээ авжээ. Үүнээс насанд хүрсэн хүн 1,435, хүүхэд 1,133 байна.
Угаарын хийнд хордсон нийт 2,568 хүнээс 15 хүн/8 хүүхэд, 7 том хүн/ нас баржээ. Угаарын хийн хордлогыг сууцны төрлөөр нь авч үзвэл гэрт 279, байшинд 575 тохиолдол байсан байна.
Бүртгэгдсэн угаарын хийн хордлогын шалтгаан нөхцөлийг нь авч үзвэл,
- зуух ханан пийшин эвдэрсэн, битүүмжлэл муутай 200,
- зуух яндангийн холбоос засвартай 118,
- яндан хөө тортогтой 108,
- үнс дүүрсэн 95,
- түлш буруу түлсэн 143,
- яндан намхан 94,
- яндангийн сойлт хаасан 189 байжээ.
Нийслэлийн мэргэжлийн хяналтын газрын агаарын чанарын хэлтсийн дарга Н.Шинэ-Оргил "Нийслэл хот нийт 154 хороотойгоос 99 нь гэр хорооллын хороо байдаг. Тус хороодод хүрч ажиллахаар 111 байцаагчийг томилоод байгаа бөгөөд байцаагч нар хэсгийн ахлагч нартай хамтарч ажиллана.
Мөн Тавантолгой түлш компанийн үйлдвэрлэсэн шахмал түлшинд нийтдээ 25 удаагийн хяналт шинжилгээ хийлээ. Магадлан итгэмжлэгдсэн хоёр лабораторид шахмал түлшийг шинжлүүлэхэд стандартын шаардлага хангаж байгаа нь тогтоогдсон. Уг шинжилгээний дүнг үндэслэн улсын байцаагчийн 15 дүгнэлт гарсан байна. Шахмал түлшийг барьцалдуулагч миддлингийг мөн шинжлэхэд хүний эрүүл мэндэд сөрөг нөлөө үзүүлэхгүй эрдэс бодис байна гэсэн дүгнэлт гарсан" гэдгийг танилцууллаа.
Улсын хэмжээнд 2010-2020 онд ахуйн хүрээнд угаартаж нас барсан нийт 64 хэрэг бүртгэгдэж, 94 хүн нас барсан байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
4 СЭТГЭГДЭЛТЭЙ
|
