Цагаан сараас өмнө Туул голоо цэвэрлэнэ
Сар шинээс өмнө хог шорооноосоо салдаг уламжлалт ёсны дагуу БОНХАЖЯ-ны харьяа газрууд, Гандантэгчинлэн хийдийн дэргэдэх Монголын бурхан шашны их сургуулийн оюутнууд, зарим ТББ-ын төлөөлөлтэй хамтран ирэх Бямба гарагт Туул голын эрэг хөвөө орчмыг цэвэрлэх гэж байна.
Цэвэрлэгээг Баянзүрхийн гүүрнээс Яармагийн гүүр хооронд хийхээр төлөвлөсөн бөгөөд энэ нь Туул голын бохирдлыг бууруулах, экологийн нөхцөлийг сэргээх чиглэлээр гарсан БОНХАЖ-ын сайдын тушаалын дагуу хийгдэж буй эхний ажил юм.
Тиймээс БОНХАЖЯ Туул голын орчныг бохирдуулахгүй байх, мөс цөмрөх болзошгүй аюулаас сэрэмжлүүлэх, байгаль дэлхийгээ дээдэлж амарч, аялахыг ард иргэддээ уриалж дээрх цэвэрлэгээг хийж байгаа юм.
Саяхан Туул голын сав газрын захиргаанаас Гачуурт тосгоноос Шувуун фабрик хүртэл голын эрэг дагуу эргүүл, хяналт шалгалт хийжээ. Энэ үеэр хог хаягдлаа хаясан, харзны усанд орохдоо голын усыг бохирдуулсан хэд хэдэн зөрчлийг илрүүлж, арга хэмжээ авсан.
Мөн Гачуурт тосгоноос Шувуун фабрик хүртэл голын эрэг дагууд гол руу тээврийн хэрэгсэлтэй ордог, иргэд харзны усанд ордог газруудын байршлыг тодорхойлж, зураглал хийжээ. Харзны усанд ордог таван байршил, тээврийн хэрэгсэлтэй ордог 10 байршилд анхааруулах, хориглох тэмдэглэгээ хийхээр төлөвлөж байна.
Цаашид БОНХАЖ-ын сайдын тушаалын дагуу Туул голын бохирдлыг бууруулах, экологийн нөхцөлийг сэргээх чиглэлээр шат дараатай арга хэмжээ авч ажиллахаар төлөвлөж байгаа аж.
