"12 аймагт булчин сулруулах бууг шууд гэрээ байгуулан худалдан авч хүргүүлэхээр төлөвлөсөн"
Баавгай хүн рүү халдсан асуудлаар Байгалийн нөөцийн бодлого зохистой ашиглалтын газрын дарга Т.Балжинням бодлогын арга хэмжээнүүдийн талаар дараах мэдээллийг өглөө.
Засгийн газрын нөөц хөрөнгөнөөс 1.8 тэрбум төгрөгийг гаргуулаад байгаа ба 12 аймагт зүү шидэгч буюу булчин сулруулах бууг шууд гэрээ байгуулан худалдан авч хүргүүлэхээр төлөвлөөд байгаа аж.
Энэ буу аймаг нийслэлд байхгүй ба өмнө нь зөвхөн олон улсын байгууллага, судлаачид судалгаа шинжилгээндээ зориулж ашигладаг байжээ. Мөн орон нутагт ажиллаж байгаа алба хаагчдын зардлыг хүсэлтийн дагуу олгож байгаа юм байна.
Өнөөдрийн байдлаар найман аймагт баавгай агнах 27 зөвшөөрөл олгосон байна. Үүнээс агнасан зургаан тохиолдол бүртгэгджээ. Агнах ажиллагааг мэргэжлийн хүмүүсээр агнуулах, цагдаа болон онцгой байдлын газартай хамтарч хийх чиглэлийг өгөөд байгаа аж.
Монгол Улсын хэмжээнд 1986 онд баавгайн тооллогыг хийж байсан ба баавгай нь нэн ховор амьтанд ордог байна. Цаашид баавгай болон бусад зэрлэг амьтны тооллогыг хийж цаашид авах арга хэмжээндээ тусгаж ажиллана гэв.
Мөн баавгай нэг орж ирсэн айл руугаа дахиж орж ирэх асуудал давтагдаж байгаа аж. Хамгийн эрсдэлтэй аймгууд буюу Хэнтийд 209, Дархан-Уулд 210, Сэлэнгэд 86, Хөвсгөлд 65 тохиолдол бүртгэгджээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
