Олон улсын цөмийн физикийн олимпиадаас Монгол Улсын багийн 1 сурагч хүрэл медаль хүртлээ
Малайз улсын Селангор мужийн Банги хотод зохион байгуулагдсан олон улсын цөмийн физикийн хоёрдугаар олимпиадаас Монгол Улсын багийн 1 сурагч хүрэл медаль хүртсэн амжилтыг үзүүлсэн талаар МУИС Цөмийн Физикийн Судалгааны Төвөөс мэдээллээ.
Тус олимпиадад оролцогчид 3.5 цагийн хоёр туршилтын ажил, 5 цагийн 5 онолын асуултаар ухаан мэдлэгээ уралдуулан шилдгүүдээ тодруулсан байна.
Манай улсаас МУИС-ийн харьяа Ерөнхий боловсролын ахлах сургуулийн 11-р ангийн сурагч Ганзоригийн ХҮСЛЭН хүрэл медаль хүртжээ. Мөн тус ахлах сургуулийн төгсөх ангийн сурагч Хүдэрчулууны ХАЧИУН, 10-р ангийн сурагч Одхүүгийн ОДЖАРГАЛ, Гансүхийн СҮНДЭРЬЯА нар Олон улсын цөмийн физикийн олимпиадад амжилттай оролцсон байна.
Монгол улсын баг сурагчдыг МУИС, ИТС-ийн дэд профессор М.Одсүрэн, ЦФСТ-ийн ЭША Б.Өсөхбаяр нар удирдан, МУИС-ийн харьяа академич Н.Содномын нэрэмжит Цөмийн физикийн судалгааны төвийн анги, лабораториудад онол болон туршлагын сургалтуудыг явуулан бэлтгэжээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
