Нийтийн эзэмшлийн талбайг хашаалсан автомашины зогсоол, ТҮЦ, гарааш буулгах ажлыг эрчимжүүлэхээр болов

Нийслэлийн удирдах ажилтнуудын шуурхай зөвлөгөөн өнөөдөр болж, нийслэлийн хэмжээнд хөрөнгө оруулалтын ажлуудын газар чөлөөлөлт болон нийтийн эзэмшлийн талбайг хашаалсан автомашины зогсоолыг чөлөөлөх, ТҮЦ, гарааш буулгах ажлыг эрчимжүүлэхийг хотын дарга Х.Нямбаатар холбогдох албаныханд даалгажээ.

Тэрбээр өнгөрсөн Бямба гарагт Сүхбаатар дүүргийн нутаг дэвсгэрт ажиллахдаа "Худалдаа үйлдвэрлэлийн дээд сургуулийн хойд тал, Спортын төв ордны зүүн талын хэсэгт явган хүн зорчих орц, гарц бараг байхгүй. Газар доор автомашины зогсоол барих асуудлыг судална.

Нийслэлийн 90 байршилд гаднын франчайз жижиг үйлчилгээтэй, автомашины зогсоол барих ТЭЗҮ-ийг хийлгэнэ.

Улсын Их Дэлгүүрийн өмнөх автомашины зогсоолыг газар доор болгох асуудлаар удирдлагуудтай нь уулзаж, ярилцана. 

Цэвэр, бохир усны шугамгүй, гудамжинд угаадсаа цацдаг ТҮЦ-ийн үйл ажиллагааг зохимжгүй гэж үзэж байгаа. Явган хүний зам хааж тавьсан ТҮЦ, пирожкины газруудыг нүүлгэнэ.

Энэ жил Их, Бага тойруу, Энхтайвны өргөн чөлөө, Наадамчдын гудамж, Олимпын гудамжны явган хүний замыг бүхэлд нь шинэчлэхээр төлөвлөсөн. Явган хүний замыг тохижуулах тендер зарлачхаад байхад оролцох ААН-үүд алга" гэж мэдээлж байсан юм.

Харин метро төслийн багийн удирдагч БНСУ-ын “Духа Инженеринг” компанийн зөвлөх үйлчилгээний багийн захирал Пак Юн Чул "Улаанбаатар хотын метро төслийн газар чөлөөлөлтийг шийдэж өгөх нь чухал асуудлуудын нэг гэдгийг дахин хэлье. 

Перу улсын метро төсөл таван жилийн дотор хэрэгжих төлөвлөгөөтэй ч орц, гарцын газрыг чөлөөлж өгөөгүйгээс одоог хүртэл ашиглалтад ороогүй байна" гэж жишээ татаж захиад байгаа билээ.

Түүнчлэн өнөөдрийн хуралдаанаас "Үйлдвэрлэл, технологийн паркийн нэгжээс паркийн удирдлагад төлөх хураамжийн хэмжээ, түүнийг төлөх журам”-ын төслийг боловсруулах, хөрөнгө оруулалтын ажлын гүйцэтгэлийн бүх үе шатанд тавих хяналтыг эрчимжүүлэх шийдэлд хүрчээ.