Ж.Анхбаяр: Дүүжин тээврийн замын сууриудыг газрын хөрснөөс доош 2-4 метрийн гүнд цутгана

Яармагийн Арцат буудлаас Нэгдүгээр хорооллын Хархорин зах хүртэл дүүжин тээврийн замыг угсрах ажил өнөөдрөөс эхэлж, суурийн хийцлэлийн талаар мэдээлэл өгөв.

Энэ тухай төслийн гүйцэтгэгч Моннис инженеринг” ХХК-ийн барилга угсралтын менежер Ж.Анхбаяр "Дүүжин замын тээврийн газар шорооны буюу өрөмдлөгийн ажил өнөөдөр эхэллээ. Уг тээврийн замын 19 тулгуур баганыг суулгахдаа доошоо 15-20 метрийн диаметртэй өрөмдөж гадсан суурь, үүний дээрээс 6-9 метр өндөр бетон сууриудыг цутгана. Дүүжин тээврийн замын сууриуд газрын хөрснөөс доош 2-4 метрийн гүнд байх юм.

Тулгуурууд нь Францаас ачигдаж замдаа гарсан, тавдугаар сард бүрэн ирнэ. Дүүжин тээврийн замыг угсарч дууссаны дараа кабиныг угсарч, ирэх оны хоёрдугаар сард бүрэн хүлээлгэж өгөхөөр Нийслэлтэй байгуулсан гэрээнд тусгасан. 

Хоёр талын зогсоолын барилгын ажлыг хийх бөгөөд Яармагийн буудалд дүүжин тээврийн кабиныг хадгалах хоёр давхар томоохон барилга баригдана.

Аюулгүй ажиллагааны хүрээнд нийслэлийн Аврах анги болон Франц улсын талтай туршлага хуваалцаж, шаардлагатай зөвлөгөө мэдээллийг авч ажиллаж байна” гэж ярилаа.

Дүүжин замын тээвэр ашиглалтад орсноор оргил цагийн үед 22 км цагийн хурдтайгаар 11 минутад 2320 хүн тээвэрлэх хүчин чадалтай бөгөөд тус бүр 10  хүний багтаамжтай нийт 98 кабин ажиллах юм байна.