Гэрэл зургийг MPA агентлагийн онцгой зөвшөөрөлтэйгөөр ашиглав

“Эрдэм судлалын төв-Ю.Цэдэнбалын академи”-ийн үйл ажиллагаатай холбоотой асуудлаар тус академийн эрдэмтэд өнөөдөр хэвлэлийн хурал зохион байгууллаа. 

Ю.Цэдэнбал агсны хүү Ц.Зориг хэлэхдээ "Одоогоос 25 жилийн өмнө академийн үйл ажиллагааг эхлүүлсэн байдаг. Өнгөрсөн хугацаанд амжилттай сайхан ажиллалаа.

Академи байгуулсан үндсэн шалтгаан нь аавынхаа нэр төрийг сэргээхийн зэрэгцээ Монголыг хэрхэн удирдаж байсан тухай залуу үеийнхэнд таниулах зорилго байсан. 

Шинжлэх ухааны үүднээс тайлбарлаж үзүүлэхийг хүссэн учраас Монголд төдийгүй олон улсын түвшинд нэр алдартай эрдэмтэд манай академид байдаг. Хууль зүйн талаас, нөгөөтээгүүр түүхийг сэргээх талаас маш олон ажлыг хийсэн гэж дүгнэдэг.

Энэ бол зөвхөн нэг хүний түүх биш, Монгол Улсын түүх гэдгээрээ олон хүн мэдэрч, ойлгох нь чухал ач холбогдолтой. Гэхдээ таагүй мэдээ дуулгахад манай академийн зарим гишүүн зүй бус үйл ажиллагаа явуулсан тохиолдол гарсан. 

Тиймээс үүсгэн байгуулагчид болон аавын минь төрөл төрөгсөд бид цуглаад Ю.Цэдэнбал академийн үйл ажиллагааг түр хугацаанд зогсоохоор шийдвэрлэж байгаа" хэмээн мэдэгдсэн юм. 

"Энэ бол гэмт хэргийн шинж чанартай үйлдэл гэж дүгнэнэ"

 

Гэрэл зургийг MPA агентлагийн онцгой зөвшөөрөлтэйгөөр ашиглав

Мөн тэрбээр "Би хатуухан хэлж байж магадгүй. Энэ бол гэмт хэргийн шинж чанартай үйлдэл гэж дүгнэнэ.

Яагаад гэвэл академийн нэрийг барьж хууль бус залилан, завших үйлдэл хийсэн, бусдад хуурамч мэдээлэл түгээсэн. Тиймээс ийнхүү академийг түр хугацаанд татан буулгаж байна.

Хэдийгээр дээрх шийдвэрийг гаргасан ч ажил үргэлжилнэ. Ю.Цэдэнбалын тухай музейг байгуулах ажлыг өрнүүлж байна.

Увс аймгийн Улаангом хотод миний аавын музей бий. Аав минь Монгол Улсыг хөгжүүлэхийн төлөө ажиллаж байсных нь хувьд Улаанбаатар хотод бас нэгэн музей байх нь зүйтэй гэж бодсон" хэмээн ярилаа.