"Их Британиас метроны төсөлд гаргах ГУРВАН ТЭРБУМ фунт стерлингийн 15 жилийн хугацаатай баталгааны бичгийг манай ЗГ-т ирүүлэхээр болсон"

Гэрэл зургийг MPA агентлагийн онцгой зөвшөөрөлтэйгөөр ашиглав

Нийслэлийн Засаг дарга Х.Нямбаатар өнөөдөр цаг үеийн асуудлаар мэдээлэл өглөө. 

Энэ үеэрээ метроны санхүүжилтийн асуудал шийдэгдсэн гэдгийг тодотгов. 

Тэрбээр "Метротой холбоотой санхүүжилтийн асуудал шийдэгдсэн гэж товчхондоо хэлье. 

Одоо зарлачхаад байгаа метроны тендерийг зогсоох, хойшлуулахгүйгээр явуулах боломж бүрдэж байгаа гэж болно. Бид урт хугацааны санхүүгийн сайн хэрэгслийг ашиглаж метроны санхүүжилтийн босгох чиглэл рүүгээ явж байна. 

Мөн синдикат банкуудтай уулзалт төлөвлөж байна. Гадаад томилолт авахаар "Томилолтоор явлаа" гэж шүүмжлүүлээд байгаа учраас синдикат банкуудтай цахим уулзалт хийх болон Улаанбаатарт урих ажлыг төлөвлөж байна" гэсэн юм.

Түүнчлэн хотын дарга Х.Нямбаатар "Нийслэлийн төсөв батлагдсан. Хөрөнгө оруулалтын олон ажлыг ирэх онд эхлүүлнэ. Түгжрэлтэй холбоотой Туулын хурдны замын төсвийг бүтэн тавьсан. Тойрог хурдны замын зөвлөх үйлчилгээний багийг тодруулах тендер шалгарч дууссан. Одоо тойрог хурдны замын "concept design" гаргах, урьдчилсан ТЭЗҮ-г гаргаж ирэх, улмаар ТЭЗҮ-г Тээврийн хөгжлийн төвөөр батлуулах бэлтгэл ажил хийгдэж байна. Батлагдсан тохиолдолд эх үүсвэрийг шийдэх боломжууд бүрдэж байгаа. Учир нь Замын сангийн хураамжууд нэмэгдсэн, албан болон өөрөө явагч хэрэгслийн татварын хувь хэмжээ нэмэгдсэнээр эх үүсвэрүүд гарч ирж байна" гэв.