Сайд Г.Сайханбаяр цол алгасаж, хурандаа Р.Чингис, Д.Загджав нарын таван хүн генерал цол хүртжээ
Тулгар төрийн 2230, 2231, Их Монгол Улсын 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ойн баярын босгон дээр Монгол Улсын Ерөнхийлөгчийн зарлигаар нэр бүхий албан тушаалтнуудад генерал цол олгосон байна.
Тодруулбал, 2022 оны долдугаар сарын 8-нд Монгол Улсын Ерөнхийлөгч, Зэвсэгт хүчний ерөнхий командлагчийн зарлигаар ХХЕГ-ын Захиргааны удирдлага эрхэлсэн дэд дарга, хурандаа Д.Мөнгөнжин, Дотоодын цэргийн штабын дарга, хурандаа Р.Чингис, ШШГЕГ-ын дарга, хурандаа Д.Загджав, ЦЕГ-ын тэргүүн дэд дарга, хурандаа Ц.Ням-Очир, тус газрын дэд бөгөөд нийслэлийн Цагдаагийн удирдах газрын дарга, хурандаа Р.Отгонжаргал нарт бригадын генерал цол олгожээ.
Мөн дээрх хүмүүсээс гадна Батлан хамгаалахын сайд Г.Сайханбаярт дэслэгч генерал цол олгосон байна. Тэрбээр 2014 онд БХЯ-ны Стратегийн бодлого, төлөвлөлтийн газрын даргаар ажиллаж байхдаа бригадын генерал цол хүртэж байжээ. Цэргийн цолны эрэмбэ дарааллаар бригадын генерал цолны дараа хошууч генерал цол олгодог. Гэтэл Батлан хамгаалахын сайд Г.Сайханбаяр хошууч генерал цолыг алгасан дэслэгч генерал цол олгожээ.
Ташрамд дурдахад, төрийн тэргүүний зарлигаар цол, шагнал олгосон үйл явдлын мэдээллийг тухай бүрд нь Монгол Улсын Ерөнхийлөгчийн албан ёсны сайтад байршуулдаг. Харин дээрх таван хүнд генерал цол олгосон тухай мэдээллийг тус сайтад мэдээлээгүй байна.
