• 6 сарын 25, Бямба
Уншиж байна ...
ХУУЧИРСАН МЭДЭЭ: 2022/04/22-НД НИЙТЛЭГДСЭН

“Эрдэнэс Тавантолгой” 2021 онд ₮1.1 их наядын орлоготой ажиллаж, улсын төсөвт ₮420.6 тэрбумыг төвлөрүүлжээ

Б.Дэлгэр, iKon.mn
2022 оны 4 сарын 22
iKon.MN
Зураг зураг
Гэрэл зургийг mpa.mn

“Эрдэнэс Тавантолгой” ХК-ийн Хувьцаа эзэмшигчдийн ээлжит хурал өнөөдөр Өмнөговь аймгийн Цогтцэций суман дахь уурхай салбар, Цанхи хотхонд болж, хувьцаа эзэмшигчдийг цахимаар оролцуулж, нээлттэй явуулжээ. 

Хувьцаа эзэмшигчдийн ээлжит хурлаар “Эрдэнэс Тавантолгой” ХК-ийн 2021 оны үйл ажиллагааны болон санхүүгийн тайлангийн талаарх Төлөөлөн удирдах зөвлөлийн дүгнэлтийг батлах, Ногдол ашиг хуваарилахгүй тухай шийдвэрийг танилцуулах, Компанийн дүрэмд оруулах өөрчлөлт, Төлөөлөн удирдах зөвлөлийн гишүүдийг сонгох болон Компанийн “А6-20” 2021-2025 онд хэрэгжүүлэх дунд хугацааны бизнес төлөвлөгөө, урт хугацааны стратеги төлөвлөгөөг танилцуулах асуудлуудыг тус тус хэлэлцсэн байна.

Дэлхий нийтээр тархсан КОВИД-19 цар тахлын дэгдэлтээс үүдэлтэй хилийн хорио тогтоосноор “Эрдэнэс Тавантолгой” ХК-ийн нүүрсний экспорт огцом буурсан боловч эрсдэлийн үеийн төлөвлөгөөг хэрэгжүүлснээр 2021 онд 1.1 их наяд төгрөгийн борлуулалтын орлоготой ажиллаж, улсын төсөвт 420.6 тэрбум төгрөгийн татвар хураамжийг төвлөрүүлж, 110.7 тэрбум төгрөгийн цэвэр ашигтай ажилласныг "Эрдэнэс Тавантолгой" мэдээлэв.

Тайлант хугацаанд Тавантолгой-Зүүнбаян, Тавантолгой-Гашуун сухайт чиглэлийн төмөр замын бүтээн байгуулалтын төслүүд, Улаанбаатар хотын агаарын бохирдлыг бууруулах зорилгоор “Тавантолгой түлш” ХХК-д шаардлагатай санхүүжилт болон холбогдох бусад томоохон төсөл, хөтөлбөрүүдийн санхүүжилтийг төр, засгийн шийдвэрийн дагуу үе шаттайгаар шийдвэрлэж ажиллажээ. 

Цаашид компанийг хөгжүүлэх “А6-20” 2021-2025 оны бизнес төлөвлөгөөг хэрэгжүүлэх, нэмүү өртөг шингэсэн бүтээгдэхүүн үйлдвэрлэх, олон улсын нүүрсний зах зээлд өрсөлдөх чадварыг сайжруулахад чиглэсэн дэд бүтэц, бүтээн байгуулалтын төслүүдийг эрчимжүүлж, УИХ-аас баталсан Шинэ сэргэлтийн бодлого, Монгол Улсын Засгийн газраас баталсан “Эрүүл мэндээ хамгаалж, эдийн засгаа сэргээх 10 (арван) их наядын цогц төлөвлөгөө”-г хэрэгжүүлж, хөрөнгө оруулалтын үр өгөөжийг нэмэгдүүлэхээр ажиллаж байгаа аж.