Богд хааны ордон музей өвлийн цагийн хуваарьт шилжлээ
Богд хааны ордон музей өвлийн цагийн хуваарьт шилжжээ.
Тодруулбал Мягмар, Лхагва гарагаас бусад өдрүүдэд 10:00-17:00 цагийн хооронд ажиллах бөгөөд сүүлийн үзэгчийг 16:15 цагт музей рүү нэвтрүүлэх юм байна.
Харин долоо хоногийн Мягмар, Лхагва гарагт амарна гэж тус музейгээс мэдээллээ.
Музейн түүхээс товч дурдвал “Билгийг хөгжүүлэн бадруулагч” /Шаравпэлжээлин/ нэртэй энэ цогцолборыг 1893-1903 оны хооронд Монголын шарын шашны тэргүүн YIII Богд Живзундамбад зориулан барьжээ.
1928 он гэхэд 2,117 зүйлийн 3,000-аад үзмэртэй болсон байжээ. Одоогийн байдлаар тус музей нь /2012-2013 оны улсын тооллогын статистик мэдээ/ 4,196 дэсийн 8,626 ширхэг үзмэртэй байна. Үүнээс үзмэр үзүүллэгт 465 дэсийн 1,146 ширхэг үзмэр буюу нийт үзмэрийн 13.8% дэлгээстэй байж олон нийтийн хүртээл болж байгаа аж.
Үзмэрүүдийг хүндрүүлэгчтэй сейф/нууцлалын өндөр зэрэглэлийн цоож, кодтой, дохиололжуулсан/, хадгалах орчин, өрөө тасалгаа нь аюулгүй, нууцлалын байдлыг бүрэн хангажээ.
