Тусгай үүргийн нислэгийн тийзийн үнийг бууруулах асуудлыг Засгийн газар хэлэлцэж байна
Гадаадаас эх орондоо ирэх хүсэлтэй иргэдийг татан авах асуудлаар Засгийн газрын ХМОНХХ-ийн дарга Ц.Ганзориг мэдээлэл өглөө.
Тэрбээр "Судалгаагаар гадаадаас нийтдээ 9,943 иргэн яаралтай эх орондоо ирэх хүсэлтэй байна. Гэхдээ ГХЯ-наас яаралтайгаар буюу ойрын хоёр сарын хугацаанд эх орондоо ирэх хүсэлтэй хүмүүсийг бүртгэхэд 2,700 орчим иргэн байна.
УОК-оос өчигдөр ирэх сард нийтдээ 12-оос доошгүй удаа тусгай үүргийн нислэг үйлдэж иргэдээ татан авах хуваарийг гаргасан.
Эх орондоо ирэх хүсэлтэй байгаа иргэдийн 50-60 хувь нь БНСУ-д оршин сууж байна.
Тиймээс ирэх сард,
- Сөүл рүү зургаа,
- Токио руу гурав,
- Европ руу хоёр,
- Нур-Султан руу нэг удаагийн нислэг тус тус үйлдэхээр болсон.
Мөн дөрөвдүгээр сард ч 12-14 удаагийн тусгай үүргийн нислэгээр иргэдээ авчирна. Удахгүй нислэгийн хуваарийг танилцуулна” гэв.
Үргэлжлүүлэн “Мөн Шадар сайдын зүгээс нислэгийн билетийн үнийг бууруулах чиглэлд үүрэг даалгавар өгсөн. Энэ асуудал ч яг одоо Засгийн газрын хуралдаанаар хэлэлцэгдэж байна.
Тиймээс билетний үнийг хэдэн хувиар бууруулах нь тодорхой болохоор нь зарлана" гэдгийг онцлов.
ВИДЕО:
