ВИДЕО: Иргэд төв талбайд цугларч, санал бодлоо илэрхийлэв

mpa.mn

Иргэд өнөөдөр үдээс өмнө Төв талбайд цуглаж, УОК-ын үйл ажиллагааг эсэргүүцэн, огцрохыг шаардсан. Уг жагсаал үргэлжилсээр байна.

Иргэдийн шаардлага, үүсээд буй нөхцөл байдалтай холбоотойгоор УОК-ын дарга Я.Содбаатар, Эрүүл мэндийн сайд Т.Мөнхсайхан нар албан үүргээсээ чөлөөлөгдөх хүсэлтээ өгөхөөр болсноо саяхан мэдэгдсэн билээ.

ШУУД ҮЗЭХ: 

Жагсаалд оролцож буй иргэн /өндөр настан/: Урд шөнө миний нойр огт хүрсэнгүй. Би хаа байгаа Баянзүрх дүүргээс таксидаад ирлээ. У.Хүрэлсүхээс гадна доор ажиллаж байгаа хүмүүс яагаад ийм харгис үйл ажиллагаа явуулж байгаа юм. Эд нар эх хүнээс төрөөгүй юм уу. Энд байгаа залуучуудыг дэмжиж байна.

Жагсаалд оролцож буй иргэн:  Ганц нэг хүн ажлаа өгч огцорсноор энэ асуудал цэгцрэх үү гэсэн эргэлзээ байна. Ингэж эргэлзэж байгаа тул шаардлага үргэлжилж байгаа юм. Мөн Нийслэлийн засаг дарга Д.Сумъяабазарын хариуцлагагүй байдал, албан тушаалд суугаад юм шийдэж чадахгүй гэдэг нь харагдсан тул бас огцрох хэрэгтэй. Юм хийж чадахгүй нь хүн болгонд мэдэгдлээ. 

Жагсаалд оролцож буй эмэгтэйчүүдийн төлөөлөл:  Бид алдаагаа харах ёстой. Төрийн албаны ёс зүй гэж зүйл бид нарын сонгосон хүмүүст алга. Үнэхээр болохгүй болоод иргэд гарч ирж байна. УОК шийдвэрээ гаргахдаа дандаа иргэдэд тулгаж хэлдэг.  Хийсэн зөв зүйл байгаа ч сүүлд гаргаж байгаа шийдвэрүүдийг ойлгохгүй байна. УОК-ын шийдвэрийг хүлээгээд бид гэртээ байгаа. 

Миний хувьд охиныгоо төрүүлэхээр эмнэлэг явуулахдаа айх юм байна.  Эмч нар яагаад ийм сэтгэлгүй юм бэ? Бид нарыг энэ хүмүүсийг сонгосон гэж байна. Үнэнийг хэлэхэд арт түмэн сонголтгүй сонголт хийсэн. Хүмүүс аргаа бараад гарч ирлээ. Ийм баян улсын иргэн болчихоод бид яагаад ядуу амьдрах ёстой юм бэ? Яагаад хэдхэн хүмүүс баян байх ёстой юм бэ? Дундаж амьдралтай хүмүүсийг тоохгүй байна.

Жагсаалд оролцож буй залуучуудын төлөөлөл: Төв талбайг зориод ирлээ. Би 20 настай, аав болох хүн. Амаржсан эхийг хараад өрөвдсөн. Монголчууд нэгдэж чаддаг гэдгээ өнөөдөр харуулж байгаа нь сайхан байна. Төрд илүү мэдлэг боловсролтой хүмүүс гарах ёстой.  Хоёр сайдыг огцруулж байгаа нь хариуцлага тооцож байгаа хангалттай хэлбэр биш. Залуучууд өөр болсон шүү.  

Бид энд ирээгүй байсан бол хангалттай хариуцлага байх байсан. Биднийг энд ирснээс хойш цагдаагийн хүчээ нэмээд, замаа хаагаад ирж нэгдэх гэж байгаа хүмүүсийг ирүүлэхгүй байна. 

Жагсаалд оролцож буй иргэн: Монгол бол коммунист улс биш. Ард түмнийг үзэл бодлоо илэрхийлэх гэхээр л хорьж, цагдаад торгоно гээд арай дэндэж байна. Ар түмэн туйлдаж байна. Ард түмэн үзэл бодлоо илэрхйилэх эрхтэй юм байгаа биз дээ.

Жагсаалд оролцож буй залуучуудын төлөөлөл: Одоо тарах хэрэгтэй. Бид УОК-ыг тараах шаардлагынхаа үр дүнд хүрсэн. Нэг зүйл хэлье. Ард түмэн одоо хэрсүү өөрсдийн толгойтой байх хэрэгтэй. Нэгэнт зорилгодоо хүрсэн учраас бүгдээрэй хэрсүү байхыг уриалж байна.

Жагсаалд оролцож буй бизнес эрхлэгчдийн төлөөлөл:  БГД-ийн иргэн байна. Залуучуудыг дэмжээд, талбайд ирлээ. У.Хүрэлсүхийн Засгийн газар бүрэлдэхүүнээрээ огцрох хэрэгтэй.  Тэд өвчинг мөнгө болгож харсан. Солонгост миний хоёр хуурай дүү байдаг.  Есдүгээр сард эх орондоо ирээд 21 хоног тусгаарлагдаад гарсан. 

Өвчин туссан хүмүүс Монголдоо ирж чадахгүй байхад та хоёр яаж ирэв гэж би асуусан. Мэдээлэл авч бүртгэл хийдэг хүмүүст мөнгө өгсөн гэж надад ярьсан. 30 хоногийн баривчилгаанаас айх цаг өнгөрсөн. Хүмүүсийн амьдрал ямар хэцүү байгааг бүгд харж байгаа. Шонхор зах дээр л гэхэд олон хүн ажилладаг. Түрээсийн үнийг нь хөнгөлөөд өгвөл махны үнэ буурах боломжтой.  Миний хувьд 27 жил бизнес эрхэлж байна.  Би нам дэждэггүй. Залуучууд энд цугласан нь зөв. Тиймээс би дэмжье гэж бодсон.

Өөрөө болж байна гэж хэр удаан явах юм бэ?  Би Ховд аймгийн хүн. Тэнд бүхий л байгууллагын үйл ажиллагаа  явагдаж байна. Сар гаруй хугацаанд усанд орж чадаагүй байсан. Саяхан нутагтаа очоод усанд ороод, үсээ засуулаад ирсэн.