ТАНИЛЦ: Шинэ парламентын гишүүдийн хүүхдүүдийн 91% нь хувийн болон тусгай хөтөлбөрт сургуульд сурч байна
2018-2019 оны хичээлийн жилд ерөнхий боловсролын сургуулиудад орон даяар 20 мянга гаруй бүлэг буюу анги хичээллэж байна. Үүний 11 хувь буюу 2,265 нь 41-70 хүртэл сурагчтай хичээллэж байгаа юм.
Энэ бол зөвхөн дэд бүтцийн хүртээмжийн асуудал бол сургалтын чанар, хүртээмжийн тал дээр төрийн өмчит болон төрийн бус сургуулийн ялгаатай байдлыг бид цувралаар танилцуулсаар ирсэн. Үүний дотор сурагчид хаана амьдарч байгаагаас шалтгаалж сурлагын чанарын үзүүлэлт тэгш бус хүртээмжтэй байгааг баталсан судалгаануудыг бид танилцуулсан.
Мөн элсэлтийн ерөнхий шалгалтын амжилтын хувьд сурагчид хувийн сургуульд сурч байгаа хүүхдүүдээс монгол хэл, Монголын түүхээс бусад хичээл дээр дунджаар 40-181 оноогоор бага байна. Мөн ЭЕШ-ын 800 хэмжээст онооны 650 ба түүнээс дээш оноо авсан хүүхдүүдийн амьжиргааны түвшин дээгүүр байгаа нь судалгаагаар тогтоогдоод байна.
Нөгөө талд төрийн өмчийн сургуулийн сурагчид Монгол хэлний тухай хуулиас шалтгаалж гадаад хэлийг тавдугаар ангиасаа үзэж буй. Өөрөөр хэлбэл, Монголд хүүхдүүд хаана төрснөөсөө хамаарч мөн ямар айлын хүүхэд болж төрснөөсөө шалтгаалж боловсролын тэгш бус байдлын золиос болж байна. Энэ нь цаашдын тэгш бус байдлын томоохон шалтгаан болж байгаа юм.
"Иргэний нийгмийн тодруулагч тайлан-2019"-д бичсэнээр чинээлэг айлын хүүхдүүд ахлах ангид хамрагдах хувь 96.6% байхад ядуу өрхийн хүүхдүүдийн ахлах ангид суралцах хувь 68.8% буюу бараг 30 хувийн зөрүүтэй байна.
Улмаар сурагчид нийгмийн ямар гаралд төрснөөсөө хамаарч насан туршийн ядуу гэдэг ангилалд амьдрахаар кастын нийгмийг бид өнөөдөр бий болгожээ.
2018 онд хийгдсэн Монголын ядуурлын судалгаагаар ядуурлын хамрах хүрээ боловсролгүй хэсэгт хамгийн өндөр байна.
iKon.mn төсөв хуваарилдаг, Засгийн газрын бодлогыг хянадаг УИХ-ын гишүүд яагаад нийтийн боловсролд анхаарал хандуулдаггүй вэ гэдгийг батлахын тулд өмнөх парламентын гишүүдийн хүүхдүүд хаана сурдаг вэ гэдгийг сурвалжлан хүргэж байсан. 2016-2020 оны парламентын гишүүдийн хүүхдүүдийн 95% нь хувийн өндөр төлбөртэй сургуульд сурч байгаа нь тэд нийтийн боловсролд анхаарал тавих ашиг сонирхол үүсэхгүй байгааг илэрхийлж байв.
Тэгвэл энэ удаагийн парламентын гишүүдийн хүүхдүүд аль сургуульд сурдгийг мөн сурвалжиллаа.
Тангараг өргөсөн 75 гишүүн байгаагаас тэдгээрийн сургуулийн насны (бидний олж тогтоосноор) 69 хүүхэд байна. Шинээр сонгогдсон гишүүдийн хүүхдүүдийн 91% нь хувийн болон тусгай хөтөлбөрт сургуульд сурч байна.
УИХ-ын гишүүдийн хүүхдүүдийн хамгийн олноор сурч байгаа хувийн сургуулийг харвал:
- Орчлон 18
- Шинэ Монгол 11
- Хобби 5
- Бритиш 6
- Эмпати 4 сурагч сурч байна.
Хамгийн олноор сурч буй төрийн өмчит сургуулиудад:
- Энгийн хөтөлбөртэй улсын сургуульд 6
- Монгол-Орос 3
- Улсын лаборатори 3
- Улсын Кембриж 2
- Улсын Лицей 2 хүүхэд сурч байна.
Графикийн тайлбар:
УИХ-ын гишүүдийг 1-75 гэсэн тоогоор санамсаргүй байдлаар дугаарласан. 1-75 дугаарын арын хаалтан дотор байх тоо нь яг өнөөдрийн байдлаарх гишүүдийн ерөнхий боловсролын сургуулийн насны хүүхдүүдийнх нь тоо болно. Бид хүүхдүүдийн аюулгүй байдлыг бодолцон гишүүдийн нэрийг санамсаргүй дараалалд оруулж ийнхүү дугаараар илэрхийллээ.
Хүүхдүүд нь аль сургуульд явж байгааг дугуй дүрс гүйж харуулж байна. (Хэрэв та энэхүү мэдээллийг гар утаснаас үзэж байвал доорх дүрслэл зөвхөн зургаар харагдаж байгааг анхаарна уу)
График 2, Зураг дээр дарж томруулж үзнэ үү!
