"Гурав ба түүнээс дээш хүүхэдтэй гэр бүлд хүүхдийн тооноос хамаарсан татварын хөнгөлөлт үзүүлнэ"

Гэрэл зургийг mpa.mn

УИХ-ын чуулганы өнөөдрийн ээлжит бус чуулганаар Монгол Улсын Засгийн газрын 2020-2024 оны үйл ажиллагааны хөтөлбөр батлах тухай УИХ-ын тогтоолын төслийн эцсийн хэлэлцүүлгийг хийж байна.

Тогтоолын төсөлд зарчмын зөрүүтэй саналын томъёоллоор санал хураалт явуулж, дараах агуулгуудыг нэмэхийг дэмжив. Үүнд:

• Хүн амын өсөлтийн бодлогын хүрээнд 3 ба түүнээс дээш хүүхэдтэй гэр бүлд хүүхдийн тооноос хамаарсан татварын хөнгөлөлт үзүүлнэ.
• Хар төмөрлөгийн (кокс, ширэм, шууд ангижруулсан төмөр) үйлдвэрлэлийг Дархан-Уул, Орхон, Дорноговь аймагт хөгжүүлнэ. 
• Газрын тос, нүүрс, хий, зэсийн баяжмал, төмөрлөг зэрэг хүнд үйлдвэрүүдийн бүтээн байгуулалтыг эхлүүлж, холбогдох дэд бүтцийн төслүүдийг хэрэгжүүлнэ.
• Оюутолгой, Эрдэнэт зэрэг томоохон үйлдвэрийн захиалгат ажлыг үндэсний жижиг, дунд бизнес эрхлэгчид гүйцэтгэх боломжийг нэмэгдүүлнэ. 
• Орхон, Дашинчилэнгээс үргэлжлэх Мянганы замын хэвтээ, босоо тэнхлэгүүдийг үргэлжлүүлнэ. 
• Төмөр замын сүлжээг түшиглэн олон улсын стандартад нийцсэн хуурай боомтыг барьж байгуулна. Налайх дүүрэгт төмөр замыг түшиглэн олон улсын стандартад нийцсэн ачаа тээвэр, логистикийн төвийг төр, хувийн хэвшлийн түншлэлээр байгуулна. 
• Нийгмийн зөвшилцөлд үндэслэсэн түншлэлийн хүрээнд шийдвэр гаргах түвшинд төр, иргэний нийгмийн байгууллага, мэргэжлийн холбоод, хувийн хэвшил зөвлөлдөх, санал авах, гаргасан шийдвэрт хяналт тавьдаг оновчтой тогтолцоог бүрдүүлнэ.
• Орхоны хөндийд шинэ хотын суурьшлын бүсийн байршлыг судалж, ТЭЗҮ боловсруулна.
• Цахим эдийн засаг, үйлчилгээний салбарыг дэмжихэд шаардлагатай дэд бүтэц болох УБ хотын дагуул хотыг байгуулна.
• Баруун бүсийн босоо тэнхлэгийн төмөр замыг ТЭЗҮ-ийг хийж дуусгана гэснийг Баруун босоо чиглэлийн төмөр замын ТЭЗҮ-ийг хийж дуусгана гэж өөрчлөх
• Мал аж ахуйг байгаль цаг уурын эрсдлээс хамгаалах бэлэн байдлыг хангах, сумдад өвч тэжээлийн нөөц бүрдүүлэх, малчдын өвс тэжээл нөөцлөх сүлжээ бий болгоно.
• "Монгол хүний хүмүүжлийг дээдэлсэн" гэсний дараа "Монгол хүний онцлогт тохирсон зан чанар, хүмүүжлийн хөтөлбөрийг" гэж нэмэх.
• Малчдыг дэмжих анхдугаар аян зохион байгуулж, мал сүргийг гэмт халдлагаас хамгаалж, ХАА-н гаралтай түүхий эд боловсруулах үйлдвэрийг бүсчилсэн байдлаар байгуулан нэмүү өртөг шингэсэн бүтээгдэхүүнийг үйлдвэрлэн, экспортолж, малчид, иргэдийн орлогыг нэмэгдүүлнэ. 

ТЭЗҮ, зураг төсөл боловсруулах шаардлагатай төсөл арга хэмжээний жагсаалтад:

МУИС-ийн харьяа Завхан их сургуулийн оюутны хотхон байгуулах гэснийг бүсчилсэн хөгжлийн үзэл баримтлалд нийцүүлэн Завхан, Ховд, Дорнод, Дархан-Уул, Орхон, Сэлэнгэ аймагт их сургуулийг хотхон хэлбэрт үе шаттай шилжүүлэх ажлын ТЭЗҮ, барилгын зураг хийнэ гэж нэмэхээр боллоо.