Францын байлдааны хөлөг дээр 668 усан цэрэг коронавирусийн халдвар авжээ
Францын тэнгисийн флотын “Charles de Gaulle” нисэх онгоц тээвэрлэгч хөлгийн 668 усан цэрэг коронавирусийн халдвар авсныг тус улсын батлан хамгаалах яам өчигдөр зарлажээ.
“Дөрөвдүгээр сарын 14-ний байдлаар 1,767 усан цэргийг шинжилгээнд хамруулснаас 668 нь халдвартай гарлаа. Тэдгээрээс 31-ийг нь Тулон хотын эмнэлэгт хэвтүүлснээс нэг нь эрчимт эмчилгээ хийлгэж байна” гэж яамны төлөөлөгч мэдээлсэн байна.
Атлантын далайд үүрэг гүйцэтгэхээр гарсан хөлөг дөрөвдүгээр сарын 12-ны өдөр замын дундаас Газрын Дундад тэнгисийн Тулон хотын боомтод буцаж ирсэн юм.
Учир нь хөлгийн хэд хэдэн усан цэргээс коронавирусийн халдварын шинж тэмдэг илэрч эхэлсэн юм байна. Хөлгийн Нийт 2,000 гаруй бие бүрэлдэхүүнийг одоо 14 хоногийн хөл хорионы дэглэмд оруулж, тусгаарлаад байгаа юм.
“Charles de Gaulle” нь Францын армийн хамгийн том нисэх онгоц тээвэрлэгч бөгөөд АНУ-аас гадна улс оронд байдаг цорын ганц цөмийн хөдөлгүүрт хөлөг ажээ.
Эх сурвалж: ТАСС
