"Гар утасны гадаргын нян нийтийн бие засах газрын тосгуурынхаас 18 дахин их байдаг тул заавал ариутгах шаардлагатай"
Дэлхийн эрүүл мэндийн байгууллагаас шинэ коронавирусийн халдвараас хамгаалахын тулд
- Гараа сайн савандаж угаах
- Амны хаалт зүүж хэвших
- Онцын шаардлагагүй бол олон нийтийн газраар явахгүй байхыг зөвлөж байгаа билээ.
Тэгвэл үүнээс гадна гар утасны гадаргууг маш сайн ариутгах шаардлагатай талаар ХӨСҮТ-ийн захирал Д.Нямхүү өнөөдөр Эрүүл мэндийн яамнаас хийсэн мэдээллийн үеэр нийтэд анхааруулсан юм.
Тэрбээр “Бид гараа угаахаас гадна байнга барьдаг гар утасныхаа бохирдлыг ч бас тооцож үзэх хэрэгтэй.
Гар утас хэрэглэгчид өдөрт дунджаар 150 гаруй удаа утсандаа хүрдэг гэсэн судалгаа бий. Түүнээс гадна гар утас элдэв нянгаар бохирдсон байдгийг АНУ-ын эрдэмтэд тогтоосон.
Тодруубал, гар утасны гадарга дээрх нянгийн хэмжээ нь нийтийн бие засах газрын тосгуурынхаас 18 дахин их байдаг байна.
Мөн ХӨСҮТ-ийн эмч нарын хийсэн судалгаагаар гар утсыг цэвэрлэхийн өмнө ба дараа тэжээлт орчинд үржих нянгийн хэмжээ харилцан адилгүй байсан бөгөөд зөвхөн дэлгэц дээрээс авсан сорьцонд л гэхэд гэдэсний болон өөр төрлийн өвчин үүсгэгч маш их нян ихээр ургасан байсан.
Тиймээс гараа сайн угаахаас гадна гар утсаа ч байнга ариутгаж цэвэрлэж байх нь зүйтэй" гэв.
Түүнчлэн гар утсаа:
- Нүдний шилний зориулалтын нэг удаагийн алчуураар,
- Гар халдваргүйжүүлэгч бодисыг зөөлөн даавуу, сальфетканд бага зэрэг шингээж арчих,
- Гаднын улс оронд ихээр дэлгэрч буй гар утсыг халдваргүйжүүлэгч багажийг хэрэглэх,
- Цэвэр ус, спиртийг тус бүр нэг хувиар холин, зөөлөн алчууранд шингээж арчих гэх мэтээр ариутгах хэрэгтэйг зөвлөв.
