Б.Түвшиндаваа: Замын санхүүжилт саатахгүй бол баруун таван аймаг ирэх жил бүрэн холбогдоно
Нийслэл хот 21 аймагтай хатуу хучилттай замаар холбогдож дуусахад тун ойрхон байна.
Энэ түүхэн ажлын сүүлчийн төсөл болох Баянхонгор-Алтай чиглэлийн 126.7 км замын бүтээн байгуулалт ажлын талаар"Макс рөүд” компанийн ерөнхий инженер Б.Түвшиндаваатай ярилцлаа.
-Баянхонгор-Алтай чиглэлийн 126.7 км замын бүтээн байгуулалтын ажлын явц хэр байгаа вэ?
-Манай компани концесс эзэмших эрх шилжүүлэх гэрээний дагуу тавдугаар сарын 13-нд замын ажлаа албан ёсоор эхлүүлсэн.
Өнөөдөр хүртэл дөрвөн сарын хугацаанд бид 30 км хатуу хучилттай авто замыг бүрэн дуусгаад байна. Дээр нь 80 км далан, газар шорооны ажлыг гүйцэтгэлээ. 88 цэгийн ус зайлуулах бетон хиймэл байгууламжийн ажил хийгдсэн байгаа. Нэг гүүрийн ажил 80 хувийн гүйцэтгэлтэй явж байна. Энэ бол нүсэр том бүтээн байгуулалт. Нийт төслийнхөө хувьд гүйцэтгэл 50 гаруй хувьтай байгаа гэж хэлж болно.Хамгийн гол нь өөрийн хөрөнгөөр дотоодын компани асар богино хугацаанд том бүтээн байгуулалтын ард гарч байгааг дуулгахад таатай байна.
-Маш богино хугацаанд шахаж ажиллаж байгаа юм байна. Хүн хүч, техникийн хувьд ямар зохион байгуулалттай ажиллаж байгаа вэ?
-Өмнө дурдсанчлан, бид маш өндөр зохион байгуулалттай ажилласны үр дүнд энэ 30 км замыг тавхан сарын дотор дуусгаж чадсан. Ийм амжилт үзүүлэлт түүхэнд байгаагүй. Баянхонгор-Алтай чиглэлийн 126.7 замын хувьд нөхцөл байдал өөрөө их хүнд. Том том боржин хаднуудаас эхлээд намгархаг газар нутаг элбэг.
Инженерийн шийдэл, ухаан, ур чадвар шаардсан ажил ихтэй. Дээр нь бид энэ замаар зорчих иргэдийнхээ ая тухыг бодон, зураг төсөлд тусгагдаагүй ажлыг өөрийн хөрөнгөөр сэтгэл гарган хийж байна. Амралтын зогсоолыг иж бүрнээр бүтээн байгуулах ажлыг манай компаниас санаачлан зураг төслийг эхлүүлээд байгаа.
-Зам дагаж хөгжил гэдэг. Энэ хоёр аймаг хатуу хучилттай замаар холбогдчихвол эдийн засгийн үр өгөөж өндөр байх нь гарцаагүй. Иргэд ч хүлээлттэй байгаа биз?
-Тэгэлгүй яах вэ. Ардын хувьсгалаас хойш 99 жилийн түүхэндээ бид анх удаа 21 аймагтайгаа хатуу хучилттай замаар холбогдох гэж байна. Сүүлчийн төсөл нь ийнхүү амжилттай өрнөж байна. Цаг хугацаандаа саадгүйгээр хэрэгжиж дуусвал жилдээ 500 мянган иргэн энэ замаар ая тухтай, саадгүй зорчино.
Дээрээс нь цаг хугацаа, эдийн засгийн хэмнэлттэй. Шороон, түр зам бол тоосжилтоос эхлээд байгаль орчинд маш их халтай байдаг. Засмал замтай болсноор энэ нөлөөлөл байхгүй болно. Машин тэрэгний эвдрэл үгүй болж, бараа таваарын эргэлт ч түргэсэж эдийн засгийн үр өгөөж өндөр байх нь гарцаагүй. Иргэд ч таны хэлснээр өндөр хүлээлттэй байгаа.
-Энэ замын төсөл дээр өмнө нь өөр компаниуд ажиллаж олон ч удаа хойшилсон байдаг.
-Засгийн газраас 2012 онд тендер зарлаж, тухайн үед нэг компани шалгарсан боловч, төслийн санхүүжилтийг улсын төсөвт суулгаж чадаагүйгээс ажил хийгдээгүй. 2015 онд мөн л санхүүжилтийн асуудлаас болж 2018 оныг хүртэл багахан хэмжээний газар шорооны ажил гүйцэтгэсэн байсан төслийг манай компанид шилжүүлэн өгсөн.
Олон жил гацсан учир иргэдийн хувьд итгэл алдрааг байсан. Замын ажил эрчтэй өрнөөд ирэхээр одоо л иргэдэг маань итгэл төрж, өндөр хүлээлттэй байгаа. Бид маш өндөр зохион байгуулалттай ажилласны үр дүнд энэхүү 30 км замыг тавхан сарын дотор дуусгаж чадлаа.
30 км-т хоёр үе асфальт хучилт хийсэн Энэ бол замын технологи чанарт үсрэнгүй дэвшил юм Авто замын түүхэнд таван сарын хугацаанд 30 км хоёр үе асфальттай авто замыг хийж тус салбарын үүсэж хөгжсөний 90 жилийн ойгоо угтаж байгаадаа бид баяртай байна.
-Хэзээ бүрэн ашиглалтад орох вэ?
-126.7 км зам маань хоёр хэсгээс бүрдэж байгаа. Нэгдүгээр хэсэг нь Байдрагийн гүүрээс Харганы худаг хүртэл 87 км, Харганы худгаас Говь-Алтайн Дэлгэр сум чиглэлийн 47.8 км зам байгаа. Би түрүүн хэлсэн.
Өөрийн хөрөнгөөр монгол компани бүтээн байгуулалт хийж байна. 200 гаруй техник, 15 үйлдвэртэй, техник хүн хүч бүгд бэлэн байна. Материал болон санхүүжилтийн хувьд саадгүй байвал ирэх онд баруун чиглэлийн зам ашиглалтад 100 хувь орно. Одоо бид 30 км замаа улсад хүлээлгэж өгөхөөр ажиллаж байна. Энэ жилийн хувьд одоо агаарын температур буурчихлаа.
Цемент, бетоны ажил зогссон. Хучилт суурийн ажлууд ч зогсоод байна. 10-аас дээш хэмийн дулаантай өдрийг харж байгаад хучилтын ажлаа ахиулж байгаа. Харин ухмал болон газар шорооны ажил бол ус хөлдтөл үргэлжилнэ.
