Зарим иргэний тэтгэврийг 50 мянган төгрөгөөр нэмэгдүүлэх хуулийн төслийг дэмжлээ

Гэрэл зургийг mpa.mn

УИХ-ын чуулганы өнөөдрийн хуралдаан эхэллээ. Хуралдаанаар хэлэлцэх асуудлыг дарааллыг УИХ-ын дарга Г.Занданшатар танилцууллаа. Хуралдааны эхэнд Үйлдвэрлэл, технологийн паркийн эрх зүйн байдлын тухай хуульд нэмэлт, өөрчлөлт оруулах тухай хуулийн төслийг хэлэлцэх эсэхийг хэлэлцэн дэмжив. 

Үүний дараа УИХ-ын гишүүн Ц.Гарамжав нарын санаачилсан Зарим иргэдийн тэтгэврийн хэмжээг нэмэгдүүлэх тухай хуулийн төслийг хэлэлцэх эсэхийг өнөөдөр хэлэлцлээ. 

Уг хуулийн төсөлд дараах болзол нөхцлөөр өндөр насны тэтгэвэрт гарсан иргэдийн тэтгэврийг 50 мянган төгрөгөөр нэмэгдүүлэх тухай заасан юм. Үүнд: 

• Төрүүлсэн болон 3 хүртэл настай нь үрчлэн авсан дөрөв, түүнээс дээш хүүхдээ зургаан настай болтол нь өсгөж хүмүүжүүлсэн 15-аас доошгүй жил ажилласан, 50 нас хүрсэн нөхцөлөөр өндөр насны тэтгэвэр тогтоолгосон эмэгтэй; 
• Төрүүлсэн болон 3 хүртэл настай нь үрчлэн авсан дөрөв, түүнээс дээш хүүхдээ зургаан настай болтол нь өсгөж хүмүүжүүлсэн 20-иос доошгүй жил ажилласан, нас харзалзахгүй нөхцөлөөр өндөр насны тэтгэвэр тогтоолгосон эмэгтэй;
• Нийтдээ 27-гоос дээш ажилласан, нас харгалзахгүй нөхцөлөөр тэтгэвэр тогтоолгосон эмэгтэй;
• Нийтдээ 32-оос дээш жил ажилласан, 55 нас хүрсэн нөхцөлөөр тэтгэвэр тогтоолгосон эрэгтэй

Нийгмийн даатгалын ерөнхий газраас гаргасан судалгаагаар 2019 оны дөрөвдүгээр сарын 1-ний байдлаар дээрх нөхцөлөөр тэтгэвэр тогтоолгосон 21.2 мянган хүний 85.8 хувь нь буюу 18.2 мянган эхчүүд, 14.2 хувь нь буюу 3.0 орчим мянга нь эрчүүд байна. Эдгээр тэтгэвэр авагчдын 80.2 хувь нь 17 мянган хүн улсын дундаж тэтгэвэр/374.8 мянга/-ээс  доогуур буюу хэт бага тэтгэвэр авдаг байна. 

Улсын дунджаас доогуур тэтгэвэр авдаг иргэдийн тэтгэврийг 50 мянган төгрөгөөр нэмэгдүүлэхэд нийт 17.2 тэрбум төгрөг шаардлагатай гэж үзсэн бөгөөд энэ хөрөнгийг улсын төсөвт суулгажээ. 

Уг хуулийг 2020 оны нэгдүгээр сарын 1-ний өдрөөс хэрэгжүүлэхээр хуулийн төсөлд заасан байна. 

Хуулийн төслийн талаар УИХ-ын гишүүн С.Бямбацогт "Шаардлагатай хөрөнгийг төсөвт суулгасан гэж байна. Гэхдээ төсөвт суусан хөрөнгийг хуульгүй бол хэрэглэж болдоггүй. Тиймээс энэ хуулийг яаралтай хэлэлцэн батлах ёстой" гэв. 

Харин УИХ-ын гишүүн Б.Бат-Эрдэнэ "Хуулийн төслийг дэмжиж байгаа. Гэхдээ 50 мянган төгрөг өнөөдрийн нөхцөлд маш бага. Тиймээс цаашдаа бага тэтгэвэртэй иргэдийн тэтгэврийг инфляцтай уялдуулж үе шаттайгаар нэмэгдүүлэх шаардлага байгааг анхаарч үзэх хэрэгтэй" гэлээ. 

Ийнхүү санал хураалт явуулахад 64.4 хувийн саналаар хуулийн төслийг хэлэлцэхийг дэмжлээ.