Монголын бурхан шашны төв Гандантэгчэнлин хийдэд өнөөдөр Бурхан багшийн рэнсрэл залах ёслол боллоо. Энэхүү рэнсрэлийг Энэтхэг улсын Дарамсала хотоос залж ирсэн бөгөөд Ховд аймгийн Ганданпунцагчойлон хийдэд босгох 18 метр өндөр Майдар бурхны шүншигт зориулан Бодь суварга, Жадонба судрын хамт Жадо Рэнбүүчи өргөн барьжээ.
Рэнсрэлийг өнөөдрөөс эхлэн наймдугаар сарыг хүртэл Гандантэгчэнлин хийдэд залах тул сүсэгтэн олон мөргөн, залбирах боломжтой юм байна.
Түүнчлэн бурхад, гэгээнтнүүд урт хугацааны турш энэрэнгүй сайхан сэтгэл, бүтээлч зөв ухамсрыг хөгжүүлсний эцэст гэгээрлийн хутгийг олж, лагшингийн эрдмийг олдгийн биелэл нь рэнсрэл ба энэ нь лагшин шүтээнээс өөрөө үржин гардаг сувдан хэлбэртэй эрдэнийн шүтээн аж.
Өнөөдөр залж буй энэхүү рэнсрэл хэмээх шүтээн нь Бирм улсад 1,000 орчим жилийн тэртээд эртний суварга дотор оршиж байсан түүхтэй бөгөөд уг рэнсрэлийг Синха Намдол Рэнбүүчигээс Жадо Рэнбүүчид өргөн барьж байжээ.