Монгол эрчүүдийн амиа хорлолт, дундаж наслалтад тестостерон дааврын дутагдал нөлөөлж байна уу?

Эрэгтэйчүүдийн тоотой хэдэн эмнэлгийн нэг болох жижигхэн хувийн эмнэлэгт нөхөр, хүүгээ дагуулсан эхнэр, ээжүүд, аавыгаа үзүүлэхээр ирсэн охид олноор хөлхөлдөнө. Эхнэр, ээжийгээ дагуулалгүй ганцаар үзүүлэхээр ирсэн нэг нь дарааллаас төвөгшөөж ирсэн зорилгоо гүйцэлдүүлэлгүй буцаж байгаа нь ажиглагдана.  

Эрэгтэйчүүдийн эрүүл мэндийн талаар ярилцахаар эмчийн өрөө рүү ороход ирсэн өвчтөн болгондоо үзүүлсээр элэгдэж хуучирсан тестостерон дааврын талаарх танилцуулга, зөвлөмжүүд байлаа.

Манай улсын эрэгтэйчүүдийн дундаж наслалт, амиа хорлолт зэрэг нь санаа зовоосон асуудал болоод удаж байна. Эдгээр нь олон зүйлсээс шалтгаалж болох ч эрэгтэй хүний хамгийн чухал даавар болох тестостерон дутагдсанаас болж байгаа нь хэний ч мэдэхгүй ч олон хүн мэдэх ёстой чухал асуудал ажээ...

Эрэгтэй хүний бие, сэтгэлзүйгээрээ эрүүл байх үндэс нь ТЕСТОСТЕРОН ДААВАР 

Тестостерон дааврыг энгийнээр тайлбарлавал эрэгтэй хүний булчин, өөх, яс, тархи, цус төлжилт, сэтгэл санаа, арьс, зүрх судасны тогтолцоо, бэлэг эрхтэн зэргийг зохицуулж байдаг чухал даавар юм. Уг даавар хэвийн хэмжээнд байвал эрэгтэй хүн бие, сэтгэлзүйгээрээ эрүүл байна гэсэн үг. 

Тестостерон даавар өндөр болон бага үед ямар ялгаатай байх вэ? 

 

/Ногоон чиглүүлэгчийг хоёр тийш гүйлгэж ялгааг харна уу/

Манай улсын эрэгтэйчүүдийн тестостероны түвшний талаар мэдээлэл эргэлзээтэй...

Сошиал сүлжээгээр судалгааны дүнд монгол эрчүүд тестостерон дааврын түвшнээр дэлхийд нэгдүгээрт жагслаа гэх мэдээлэл тархсан.

Тэгвэл үнэхээр уг судалгаа дээрх шиг манай улсын эрэгтэйчүүд нийтээрээ тестостерон даавар өндөртэй байгаа бол яагаад дундаж наслалт нь ийм бага, амиа хорлолтын тоогоороо давамгайлж түүнчлэн зүрх судасны өвчлөлд их өртөж, тэтгэвэрт гараад зургаахан жил болоод нас барж байна вэ? 

Манай улсын эрэгтэйчүүдийн талаар зарим баримт: 

 

Олон жил тестостерон дааврын шинжилгээг хийсэн лабораторийн датанаас харахад бодит байдал эргэлзээтэй байлаа. Тодруулбал  тестостерон дааврын хамгийн өндөр түвшинд буюу 8-10-ын хооронд байх ёстой 18-29 насны залуучуудын дааврын түвшин ердөө 1-3-ын хооронд байв. Бэлгийн бойжилт эхлэх үеэс тестостерон дааврын хэмжээ ихэссээр 20-оод насан дээр хамгийн оргил үе дээрээ ирж түүнээс цааш нас ахих тусам буурдаг аж.

Гэтэл манай улсын 20-оод насны залуучуудын тестостерон дааврын түвшин 60,70 настай хүмүүсийнх шиг байна. Түүнчлэн эмнэлэгт үзүүлэхээр ирсэн эрэгтэйчүүдийн дийлэнхийнх нь тестостерон дааврын түвшин унасан байдаг талаар Цэ-пү эрэгтэйчүүдийн эмнэлгийн эмч Ц.Ариунбаяр хэлж байлаа.

"Тестостерон дааврыг бууруулж  байдаг амьдралын хэв маягууд манай улсын залуучуудад түгээмэл байна"

Үргэлжлүүлэн түүнтэй уг дааврын талаар ярилцахад тестостерон дааврыг бууруулж  байдаг амьдралын хэв маягууд манай улсын залуучуудад түгээмэл байна гэдгийг тэрбээр онцолсон юм. 

Нийтээрээ тестостерон даавар багатай байх магадлалтайг лабораторийн датанаас өөр юу баталж байгаа талаар түүнээс асуухад тэрбээр "Түрүү булчирхайг эрүүл байлгадаг гол зүйл нь тестостерон даавар. Тестостерон унах юм бол түрүү булчирхайн үрэвсэл, томрол, хорт хавдар зэрэг өвчлөл гарсаар байна. Манай улсад эдгээр өвчлөл их байна гэдэг нь л нийтээрээ тестостерон түвшин багатай байгааг харуулж байгаа юм" гэв.

Түүнчлэн тестостерон даавар нь гол өөх шатаагчдын нэг бөгөөд сүүлийн үед залуучууд 25 хүрээд эрчимтэй жин нэмж, таргалснаас үүдэх зүрх судасны өвчнөөс болж амь насаа алдаж байгаа тохиолдлууд ч гарсаар байгаа билээ. 

Таргалалтыг дагаад чихрийн шижингээс эхлээд олон төрлийн өвчин үүсэх нь ойлгомжтой. Өдөр болгон л чихрийн шижин өвчтэй хүмүүс ирж үзүүлж байна хэмээн эмч халаглан хэлж байв. 

НЭМГ-аас мэдээлснээр манай улсын эрэгтэйчүүдийн:

 

"Тестостерон дааврыг өсгөх хамгийн зөв эмчилгээ бол амьдралын хэв маягтаа анхаарах"

- Тестостерон даавар унахад юу нөлөөлдөг вэ? 

- Тестостерон даавар унаж байгаа шалтгаан нь амьдралын хэв маягтай л холбоотой. Тестостерон дааврыг нойроороо нөхөж байдаг учраас уг даавар нь унасан хүмүүст хамгийн түрүүнд эрт унтаж байхыг зөвлөдөг. Улаанбаатарчууд биологийн цагт захирагддаггүй дураараа хүмүүс. Хөдөө бол байгалийн хуульд захирагдаж нар жаргаад л унтчихдаг. Хүмүүс найман цаг нойроо авчих л юм бол боллоо гэж үзээд байдаг. Гэтэл найман цаг унтах нь чухал биш хэдэн цагт унтах нь л чухал юм. 

Шөнийн 00:00 цагаас өмнөх нойр хамгийн чухал буюу тестостерон үүсгэх чадвартай байдаг.

Манай эмнэлэг дээр дархлаа нь унасан, сурлага нь муудчихсан гэсэн асуудалтай оюутнууд их ирдэг. Оюутнууд үүр цайтал сууж хичээлээ хийх гээд байдаг. Гэтэл ядарчихсан тархи мэдээллийг хүлээж авахгүй шүү дээ. Эсрэгээрээ эрт унтаад эрт босдог болбол байдал өөрчлөгдөнө.  

Манай улсад эрт унтаж, өглөө босож байгаа хүн байхгүй байгаа нь тестостерон дааврын түвшин бага байгаа шалтгаан юм. Тестостерон дааврыг өсгөх хамгийн зөв эмчилгээ бол амьдралын хэв маягтаа анхаарах мөн нойр. Хэчнээн эм ууж тариа тариулаад нойроо цэгцэлж чадахгүй бол үр дүнгүй. 

"тестостероны талаар нийтээрээ зөв ойлголттой болбол залуу насандаа нас барж буй хүмүүсийн тоог бодитойгоор цөөлөх боломжтой" 

- Амьдралын хэв маягаас гадна юу нөлөөлдөг вэ? Тестостерон унаснаар ямар сөрөг үр дагавруудтай вэ? 

- Д витамин их чухал. Гадуур Д витамины илүүдлийн талаар хуурамч мэдээлэл их гарснаас болж хүмүүс их айдаг болсон байна. Гэтэл бид чинь Д витамин нарнаас авахад хамгийн хэцүү бүс нутагт амьдарч байгаа хүмүүс шүү дээ. Д витамин унавал дагаад тестостерон даавар унасаар байдаг. 

Тестостероны уналтыг дагаад хүний IQ унаж, ой тогтоолт, анхаарал төвлөрөл, тархины үйл ажиллагаа мууддаг. Дээрээс нь сэтгэл гутралд ордог. Улмаар амиа хорлох үзэгдэл тестостерон даавар нь уначихсан хүмүүс дээр түлхүү ажиглагддаг. Амиа хорлолтоороо монгол эрэгтэйчүүд дээгүүр жагсаж байна шүү дээ. 

Иймд тестостерон дааврын талаар нийтээрээ зөв ойлголттой болох юм бол таргалалт, зүрх судасны өвчин, чихрийн шижин, амиа хорлолт зэрэг олон асуудлыг шийдэж залуу насандаа нас барж буй хүмүүсийн тоог бодитойгоор цөөлөх боломжтой. 

Тестостерон дааврын дутагдлыг илрүүлэх олон улсын асуумжийг бөглөх бол ЭНД ДАРНА УУ.  

Энэ асуумжийн тусламжтайгаар ямар шинжилгээ нэмэлтээр хийх, ямар чиглэлийн эмчилгээ хийхээ эмч төлөвлөдөг, үр дүнгээ хянадаг байна.

Өвчтөний хувьд энэ асуумжийг бөглөснөөр өөрийн асуудлыг мэдэж авах, цаг алдалгүй эмчид үзүүлж тусламж авахад хэрэг болдог ажээ. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Монголд тестостеронтой холбоотой нотолгоонд суурилсан судалгаа хангалтгүй байгаа хэдий ч өдөр болгон эрэгтэйчүүдийн асуудлаар шаналсан өвчтөнүүдтэй уулздаг мэргэжилтний ярианаас дүгнэхэд уг даавар нь нийтээрээ анхаарал хандуулж зөв ойлголттой болох хэрэгтэй, эрэгтэй хүний эрүүл мэндтэй нягт холбоотой өргөн сэдэв ажээ.