Индэр    
2021 оны 3 сарын 25
Зураг
iKon.mn сэтгүүлч

Эрүүл мэндийн сайд С.Энхболд "өнгөрсөнд үлдчихсэн"

Зураг
Гэрэл зургийг MPA.mn

КОВИД-19 халдварын нөхцөл байдал, мэдээлэл цаг тутам шинэчлэгдэн хүрч байгаа. Үүнтэй уялдуулж ажил, амьдралаа өдөр бүр төлөвлөж буй энэ үед Эрүүл мэндийн сайд С.Энхболд өөрөө олон нийтийг төөрөгдүүлэхүйц зөрүүтэй мэдээлэл өгсөөр байна.

2021 оны гуравдугаар сарын 22-ны өдөр болсон УОК-ын хуралдааны дараа мэдээлэл хийх үеэр Эрүүл мэндийн сайд сэтгүүлчдийн асуултад хариулсан. Гэвч Төрийн ордноос ийнхүү ярихдаа хэд хэдэн зөрүүтэй мэдээлэл өгсөн нь ЭМЯ болон ХӨСҮТ-ийн мэргэжилтнүүдийн мэдээллээр батлагдав.

НЭГ. Эрүүл мэндийн сайд энэ өдөр "Дотоодод халдвар бүртгэгдсэнээс хойш 747 хүүхэд халдвар авсан" хэмээн хэлсэн.

Тэгвэл маргааш өдөр нь буюу 23-ны өдрийн ЭМЯ-ны ээлжит хэвлэлийн хурлын үеэр ХӨСҮТ-ийн Тандалт, судалгааны албаны дарга Ж.Байгалмаа "Гуравдугаар сарын 22-ны өдрийн байдлаар Монгол Улсад 0-17 насны 1,100 хүүхэд халдвар аваад байна. Энэ нь нийт батлагдсан тохиолдлын 20 орчим хувийг эзэлж байгаа бөгөөд 80 хувь нь дотоодод халдвар авсан" хэмээн хэлсэн. 

Тэгэхээр 22-ны өдрийн байдлаар дотоодод халдвар авсан хүүхдийн тоо 880 орчим байж. Гэтэл ЭМ-ийн сайд 100 гаруйгаар дутааж хэлжээ. 

ХОЁР. Эрүүл мэндийн сайд "65-аас дээш насныхныг ирэх долоо хоногоос вакцинд хамруулна" хэмээн хэлсэн. Сайдын хэлснээр 65-аас дээш насныхныг дархлаажуулах ажил энэ сарын 29-нөөс эхлэхээр төлөвлөгджээ.

Харин бодит байдал дээр өнөөдрийн байдлаар 2 мянга гаруй хүн вакцины эхний тунд хамрагдаад байгааг ЭМЯ-ны хэлтсийн дарга Г.Болдмаа мэдээлэв.

ГУРАВ. "Дотоодод анхны халдвар бүртгэгдсэнээс хойш 132 өдөр өнгөрөөд байна. Энэ хугацаанд 12-21 хоногийн хугацаатай 3 удаа хөл хорио тогтоосон. Хөл хорио тогтоогоогүй байсан бол халдварын тохиолдол 4,000, 5,000-аар яригдах байсан" хэмээн Эрүүл мэндийн сайд хэлсэн.

Сайд аа!  Өнөөдрийн байдлаар улсын хэмжээнд нийт халдварын тоо 5,895 болоод байна. Дотоодын халдварын тоо 5,359 болоод байгаагийн 4,917 нь гурван удаа хөл хорио тогтоосон Улаанбаатар хотод бүртгэгдсэн.

Эрүүл мэндийн сайд мэдээлэл хийсэн тухайн өдөр нийт 210 тохиолдол бүртгэгдэж, халдварын нийт тоо 5,186 болсон байсан бөгөөд 4,000-ыг даваад хоёр хонож байв. Харин Лхагва гараг буюу гуравдугаар сарын 24-нд 5,000 давсан юм.

Өнөөдөр 155-аас олон хүн халдвартай нь батлагдвал халдварын нийт тоо 6,000 давах хэмжээнд хүрээд байна.  



Үнэн бодит мэдээлэл юу юунаас илүү чухал байгаа цар тахлын энэ үед Эрүүл мэндийн салбар хариуцсан сайд хамгийн баталгаатай эх сурвалж гэж бид үзэж буй. Тэгвэл Эрүүл мэндийн салбарын хамгийн гол эх сурвалж болох С.Энхболд сайд сүүлийн үеийн тоон мэдээллээ ийнхүү "өнгөрсөнд үлдчихсэн" мэт хоцрогдолтой, зөрүүтэй өгч байна. 

x