- Монгол Улсын Ерөнхий сайд Ч.Сайханбилэг БНХАУ-ын Засаг захиргааны онцгой бүс Хонконгт болж буй Азийн хөрөнгө оруулалтын чуулга уулзалтад оролцож байна -
Тэрбээр өнөөдөр Азийн Дэд Бүтцийн Хөрөнгө Оруулалтын Банкны Ерөнхийлөгч Зинь Люцинийг хүлээн авч уулзлаа. Уулзалтад Сангийн яамны Төрийн нарийн бичгийн дарга Х.Ганцогт, Гадаад хэргийн яамны Төрийн нарийн бичгийн дарга Д.Ганхуяг болон албаны бусад хүмүүс оролцлоо.
Азийн Дэд Бүтцийн Хөрөнгө Оруулалтын Банкны Ерөнхийлөгчийн албанд томилогдон ажиллаж буйд Ерөнхий сайд баяр хүргээд манай улс тус банкийг үүсгэн байгуулах тухай саналыг хүлээн авч, дэмжиж ирснийг онцоллоо.
Монгол Улсын Ерөнхий сайд Ч.Сайханбилэг "Монгол Улсын "Талын зам”, Хятадын “Торгоны замын эдийн засгийн бүс” болон ОХУ-ын “Евразийн эдийн засгийн холбоо” санаачилгатай тус тус уялдуулж, “Монгол-Орос-Хятадын эдийн засгийн коридор” байгуулахаар Монгол Улс, ОХУ, БНХАУ-ын төрийн тэргүүн нар тохиролцож, 2015 оны оны 7 дугаар сард ОХУ-ын Уфа хотноо болсон гурван талт уулзалтын үеэр санамж бичигт гарын үсэг зурсан.
Талууд харилцан тохирсны дагуу Монгол Улс, ОХУ, БНХАУ-ын хооронд эдийн засгийн коридор байгуулах тухай хөтөлбөрийг хамтран боловсруулахаар ажиллаж байгаа. Энэ хүрээнд хэрэгжүүлэх дэд бүтцийн төслийг хамтран хэрэгжүүлэхэд шаардагдах санхүүжилтийн эх үүсвэрийг тус банктай хамтран ажиллах замаар шийдвэрлэх саналтай байна." гэдгээ хэллээ.
Азийн Дэд Бүтцийн Хөрөнгө Оруулалтын Банкны Ерөнхийлөгч Зинь Люцинь "Азийн хөрөнгө оруулалтын банк нь 57 гишүүнтэй бөгөөд улс орнууд дотоодын нийт бүтээгдэхүүнийхээ хэмжээгээр хувь эзэмшдэг. Манай улс Азийн хөрөнгө оруулалтын банкны анхны 12 гишүүний нэг нь бөгөөд эхний төслүүдээ Монгол Улсад хэрэгжүүлэх сонирхолтой байгааг хэлээд дэд бүтцийн салбарын бэлэн төсөл байвал судалж үзнэ.
Монгол Улсын ач холбогдолтой гэсэн томоохон төслүүдэд хийх хөрөнгө оруулалтуудыг богино хугацаанд шийдвэрлэх боломжтой". гэв.
Ерөнхий сайдын албан уулзалтууд үргэлжилж байна гэж Засгийн газрын Хэвлэл мэдээлэл, олон нийттэй харилцах албанаас мэдээллээ.