Иргэдэд НӨАТ-ын хоёр хувийг БУЦААН ОЛГОНО
Шинэчлэн батлагдсан НӨАТ-ын хуулийн дагуу иргэдэд өдөр тутмын худалдаа, үйлчилгээний төлбөрт багтдаг нэмэгдсэн өртгийн албан татварын хоёр хувийг буцаан олгох урамшууллын системийг 2016 оны нэгдүгээр сарын 1-нээс эхлэн хэрэгжүүлэхэд бэлэн болжээ.
Уг хуулийг хэрэгжүүлж эхлэхэд технологийн бэлэн байдлыг хангах талаар өнөөдөр МҮХАҮТ-ийн үзэсгэлэнгийн танхимд Сангийн яам, Татварын Ерөнхий Газар болон Худалдаа аж үйлдвэрийн танхим хамтран Монгол Улсын тэргүүлэх 34 аж ахуйн нэгжийн удирдлагуудтай уулзалт зохион байгууллаа.
Уулзалтыг нээж Сангийн сайдын зөвлөх С.Пүрэв төрөөс татварын системийг боловсронгуй болгохтой холбогдуулан мэдээлэл танилцуулга хийлээ.
Тэрбээр “ААН байгууллагууд иргэдийн хяналт дор татвараа төлдөг шинэ тогтолцоо руу бид шилжиж байна. Хяналт тавих үүргээ гүйцэтгэснийх нь төлөө иргэддээ НӨАТ-ын хоёр хувийг буцаан олгох юм.
НӨАТ одоогийн хуулиар 10 байгаа. Үүнийг эцсийн хэрэглэгчид болох манай иргэд төлдөг бөгөөд ААН байгууллагууд суутган авч улсад төлөх зарчмаар явж ирсэн. Шинэ хууль хэрэгжиж эхэлснээр иргэддээ хоёр хувийг нь буцаан олгоно. Тийм учраас иргэн бүр баримтаа цуглуулах шаардлагатай болно гэсэн үг. Ингэхдээ заавал цаасан баримт цуглуулж хадгалахгүй. Баримтын дугаараа Татварын Нэгдсэн Системд бүртгүүлсэн тохиолдолд цаасан баримтаа хадгалах шаардлагагүй” хэмээн ярилаа.
Монгол Улсын хэмжээнд үйл ажиллагаа эрхэлж буй аж ахуйн нэгж байгууллагууд нь дээрх хуулийн хэрэгжилтийг хангахын тулд Татварын Нэгдсэн Системд технологийн түвшинд холбогдох шаардлагатай ба 2016 оноос өмнө холболтоо хийж, баталгаажуулах шаардлагатай байгаа ажээ.
ААН байгууллагууд кассын машинаа солихгүйгээр Татварын Нэгдсэн Системд холбогдож, нэгдсэн нэг стандартын баримтыг хэвлэн гаргана.
Одоогийн байдлаар “Миний дэлгүүр” сүлжээ болон “Sky” их дэлгүүр Татварын Нэгдсэн Системд технологийн түвшинд холбогдоод байгаа бөгөөд 2016 оны нэгдүгээр сарын 1-ний өдрөөс эхлэн НӨАТ-ын урамшуулал авах боломжтой баримтыг хэвлэж эхлэх юм байна.
Энэ талаар ТЕГ-ын НӨАТ-ын урамшууллын системийг хөгжүүлэх төслийн захирал Р.Отгонтулга ярихдаа “Улсын хэмжээнд Худалдаа, үйлчилгээ эрхлэгч ААН-үүд нэгдсэн нэг стандарттай, сугалааны дугаар бүхий төлбөрийн баримт хэвлэдэг болсноор иргэд худалдан авалт болгоноосоо НӨАТ-ын урамшуулал авч, үндэсний сугалаанд оролцох таатай нөхцөл бүрдэх юм.
Тиймээс өнөөдрийн уулзалтад сүлжээ дэлгүүрүүд, банкнууд, үүрэн холбооны операторууд гэх мэт иргэд өдөр бүр үйлчлүүлдэг, баримт авдаг байгууллагуудыг урьж авчраад байна.
Цаашид энэ төрлийн уулзалтыг Монгол Улсын хэмжээнд үйл ажиллагаа явуулж буй бүхий л аж ахуйн нэгж байгууллагуудтай хамтран зохион байгуулахаар төлөвлөж байгаа бөгөөд энэ нь нэмэгдсэн өртгийн албан татварын урамшууллын системийг ирэх онд амжилттайгаар хэрэгжүүлэхэд өндөр ач холбогдолтой юм” гэлээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
30 СЭТГЭГДЭЛТЭЙ
|
