Г.Дэнзэн: Миний бие ямар нэгэн хэргээс зугтан эх орноосоо дүрвэж, оргон зайлаагүй

Засгийн газрын хэрэг эрхлэх газрын дэд дарга асан Г.Дэнзэнтэй холбоотой асуудлууд олны анхаарлыг татсан хэвээр байгаа. Саяхан түүнийг АТГ-аас шалгах болсонтой холбоотойгоор оргон зайлжээ гэх мэдээлэл цацагдсан. Харин Г.Дэнзэнгийн хувьд дээрх мэдээллийг гүтгэлэг хэмээн мэдэгдээд, эх орноосоо оргоогүй гэдгээ илэрхийлэн захидал илгээжээ. Ингээд түүний бүрэн эхээр нь хүргэе.

Монгол Улсын иргэн Г.Дэнзэн миний биеийг хил даван оргон зайлсан гэх огт үндэслэлгүй, ээлжит гүтгэлгийг хэвлэл мэдээллийн хэрэгсэл ашиглан зориудаар нийтэд түгээж буйг залруулахын тулд уг ил захидлыг бичиж байгааг минь ойлгон хүлээн авна уу.

Намайг чиглэсэн олон удаагийн гүтгэлэг нь эхэндээ улстөрийн зорилготой байсан бол одоо хэрээс хэтэрч эдийн засгийн бүлэглэлүүдийн хуйвалдаанаа далдлах явцуу эрх ашгийн зорилготой болж өөрчлөгдсөнийг залуу хүний хувьд зүгээр хараад сууж тэвчсэнгүй.

Надад хийсэн гэм байхгүй учир би буруугүй хэмээн тайлбарлаж, олон зүйл тоочих шаардлагагүй гэж бодож байна. Хоёр жил гаруй үргэлжилж буй энэ гүтгэлэгтэй холбогдуулан өнөөдрийг хүртэл намайг хуулийн байгууллагаас зарлан дуудаж, шалгасан нэг ч тохиолдол байхгүйг энд зориуд хэлэх нь зүйтэй байх.

Хэн нэгний гэм буруутай эсэхийг гүтгэлэг доромжлолоор бус Монгол Улсын шүүх шийддэг гэж бодож байна. Харин үнэн зүйлийг хэлж ярьсан нь хэлмэгддэг болсон энэ нийгэмд цаашид хэрхэхийг би мэдэхгүй.

Эх орондоо байхгүй байгааг минь ашиглан гүтгэлгийн шинжтэй мэдээ мэдээллийг зориудаар тараахгүй байхыг хичээнгүйлэн хүсье.

Та бүхнийг хүндэтгэсэн 

Монгол Улсын иргэн

Г.Дэнзэн