Б.Дашпүрэв: Зориулалтын саванд шатахуун өгөхгүй бол АҮЭБЯ-нд гомдол мэдүүлж болно

Б.Мөнхтуяа, ikon.mn
3 минутын өмнө
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

Шатахууны хангамж нэмэгдүүлэх үүрэг бүхий шуурхай штабаас ээлжит хурлаа өнөөдөр зохион байгууллаа.

Аж Үйлдвэр, Эрдэс Баялгийн Яам(АҮЭБЯ)-ны Төрийн нарийн бичгийн дарга Б.Дашпүрэв “Наймдугаар сард АИ92 автобензин 74,780 тонныг авахаар захиалснаас 68,502 тонн бүтээгдэхүүн нийлүүлэгдсэн. Дизель түлш 158,530 тонныг захиалснаас эх үүсвэрээс ямар ч саадгүй бүгд нийлүүлэгдэж орж ирлээ.

Өнгөрсөн 24 цагийн хугацаанд Улаанбаатар хотын хэмжээнд 1,100 тонн автобензин, орон нутгийн хэмжээнд 681 тонн автобензин нийлүүлсэн.

Есдүгээр сарын захиалгаа баталгаажуулаад байгаа. Манай улсын сарын хэрэглээ АИ92 төрлийн автобензин 65,000 тонн, дизель түлш 150,000 тонн болж, нэмэгдсэн. Есдүгээр сард энэ хэрэглээг хангалттай нийлүүлэх хэмжээнд захиалгаа баталгаажуулсан” гэв.

Мөн тэрээр шуурхай штабаас өнөө оройдоо автобензин болон дизель түлшний хомсдолтой байгаа 30-40 сумын хангамжийн асуудлыг дахин нягталж, шатахуун ачихын зэрэгцээ дугаарлалтыг хэвийн болгох чиглэлд ажиллаж байгааг дурдлаа.

Түүнчлэн "Галын аюулгүй байдлыг хангасан зориулалтын саванд шатахуун өгөх мэдэгдэл, саналыг аж ахуй нэгжүүдээс гаргаж буй бөгөөд үүнийг 100 хувь хэрэгжүүлж ажиллаж байгаа. Аливаа ШТС саванд шатахуун өгөхөөс татгалзвал Аж Үйлдвэр, Эрдэс Баялгийн Яам(АҮЭБЯ)-ны гомдол санал илгээх утсанд мэдэгдэх боломжтой" гэж онцлов.