Н.Отгонбаяр: Эзэнгүй нохой, муурны үржлийг хязгаарлана

Улаанбаатар хотод эзэнгүй нохой, муур, мал амьтныг барьж, асрамжлах газарт байрлуулах ажлыг энэ сарын 24-28-ны өдрүүдэд зохион байгуулж байна.

Энэ тухай УБЗАА-ны Захиргаа, санхүүгийн удирдлагын газрын дарга Н.Отгонбаяр "Энэ онд эзэнгүй нохой, мууртай холбоотой удаа дараа олон гомдол ирсэн. Иймд эзэнгүй нохой, муурыг эзэнтэй болгох, түр асрах байранд аваачиж анхан шатны вакцин хийх, туулга өгөх, үржлийг хязгаарлах үйлчилгээг үзүүлж байна.

Энэхүү ажлыг нийслэлийн зургаан дүүрэгт цагдаа, онцгой байдлын байгууллага болон УБЗАА, бусад байгууллагын 1,000 гаруй ажилтан, албан хаагчтай хамтран зохион байгуулж байгаа юм" гэв.

Сонгинохайрхан дүүргийн 20 дугаар хорооны дарга Я.Чулуунхүү "Манай хороонд гэр хороолол, байшин хороолол, үйлдвэрлэлийн бүс ихтэй, эзэнгүй нохой ирж зулзагалдаг. Эзэнгүй нохой, муурыг барих, эзэнжүүлэх арга хэмжээ хоёр дахь өдрөө үргэлжилж, өнөөдөр Туулын бургасыг самнаж байна.

Ингэснээр иргэдийн эрүүл, аюулгүй орчинд амьдрах нөхцөлийг бүрдүүлэх зорилготой" гэж мэдээллээ.

Монгол Улсын хэмжээнд нэг жилд дунджаар 6,900 хүн, Улаанбаатар хотын хэмжээнд 3,000 хүн галзуу нохойд уруулж, ноцуулж, хазуулж, шүлстүүлсний улмаас галзуугийн вакцинд хамрагддаг байна. 

Уг ажил дөрөвдүгээр сарын 28, 29-ний өдрүүдэд Богд ууланд үргэлжлэх тул иргэд аюулгүй байдлаа хангах үүднээс Богд уул руу аялахгүй байхыг зөвлөлөө.