ФОТО: "D-Parliament.mn дээр цахим гарын үсэг цуглуулахыг идэвхжүүлэхгүй байгаа тул цаасан дээр зуруулж байна"

Гэрэл зургийг MPA агентлагийн онцгой зөвшөөрөлтэйгөөр ашиглав

Гэр бүл, хөдөлмөр, хамгааллын сайд Л.Энх-Амгалангийн өргөн барьсан Ажиллах хүчний шилжилт хөдөлгөөний тухай хуульд нэмэлт, өөрчлөлт оруулах тухай хуулийн төслийг эсэргүүцэж буй иргэдийн жагсаал гурав дахь өдрөө үргэлжилж байна. 

Иргэдийн Оролцооны Нэгдэл Нам(ИОНН)-ын дарга Ц.Оюунгэрэл "ИОНН-аас гурав хоногийн турш жагсаал хийхээр зарласан. Мөн өчигдөр, уржигдар жагсаж буй залуустай нийлж жагсаалаа зохион байгуулж, Л.Энх-Амгалангийн өргөн барьсан хуулийг эрс эсэргүүцэж буй иргэдийн гарын үсгийг цуглуулж байна.

Гарын үсгийг цаасан дээр цуглуулж байгаа. D-Parliament.mn дээр гарын үсэг цуглуулахаар өргөдлөө гаргасан боловч идэвхжүүлэхгүй байна. Цахимаар гарын үсэг цуглуулах иргэдийн эрхийг боогдуулж байгаа учраас цаасан дээр гарын үсэг цуглуулж эхэлсэн. Бид өнөөдөр 1,000 гаруй гарын үсэг цуглуулах зорилготой" гэсэн юм.

Жагсаж буй иргэд гадаадаас ажиллах хүч авахтай холбоотой хуулийн төсөл өргөн барьсан Л.Энх-Амгалан, П.Сайнзориг нарын зургаан гишүүнийг эргүүлэн татахыг шаардаж байна. Мөн зарим иргэн "Засгийн газар огцор" гэсэн бичиг барьжээ.

Харин сайд Л.Энх-Амгалан "Засгийн газраас өргөн барьсан Ажиллах хүчний шилжилт хөдөлгөөний тухай хууль нь таван заалттай. Энэ таван заалтад ажиллах хүчний квоттой холбоотой нэг ч заалт байхгүй. Харин ажлын байрны төлбөрөөс чөлөөлөх асуудлыг хөндсөн. Засгийн газраас өргөн барьсан хуулиар "280 мянган хужаа оруулж ирэх гэж байна" гэдэг мэдээлэл тарааж байгаа. Ингэж мушгин гуйвуулж, Засгийн газраас өргөн мэдүүлсэн хуулийн төслийг эсэргүүцье гэж уриалж байгаа хэдхэн хүн бий" хэмээгээд буй.

ФОТО: