ФОТО: Паралимпын аварга У.Сүрэнжав, мөнгөн медальт Г.Болор-Эрдэнэ нар эх орондоо ирлээ

Гэрэл зургийг MPA агентлагийн онцгой зөвшөөрөлтэйгөөр ашиглав

Францын Парис хотод болж буй паралимпын наадамд амжилттай оролцож алтан медаль хүртсэн Завхан аймгийн Тосонцэнгэл сумын харьяат, "Алдар" спорт хорооны тамирчин Уламбаярын Сүрэнжав, мөнгөн медаль зүүсэн Монгол Улсын гавьяат тамирчин, "Алдар" спорт хороонд харьяалалтай Ганбатын Болор-Эрдэнэ нар өнөөдөр эх орондоо ирлээ.

Тэднийг "Чингис Хаан" олон улсын нисэх онгоцны буудал дээр гэр бүл, найз нөхөд, "Алдар" спорт хорооны удирдлагууд, холбоо болон клубийнх нь хамтрагчид угтаж авсан юм.

Энэ үеэр Г.Болор-Эрдэнээс сэтгэгдлийг нь тодруулахад "Монголын таеквондогийн удирдлагууд, энэ спортыг шимтэн үздэг ард түмэндээ маш их баярлалаа. Та бүхний надад итгэх сэтгэл урам зориг хайрлаж байлаа. Итгэлийг нь алдалгүй өндөр амжилт гаргасандаа баяртай байна. Дараагийн паралимпад алт авах хүртлээ бэлтгэлээ улам чамбай хийнэ" гэв.

Мөн У.Сүрэнжав "Парисын тэнгэрт төрийнхөө далбааг мандуулсандаа маш их баяртай байна. Энэ хүртэл тусалж дэмжсэн гэр бүл, найз нөхөд, баг хамт олондоо талархал илэрхийлье. Паралимпын алтан медаль авах зорилгоор өдөр бүр эрчимтэй бэлтгэл хийж байлаа. Зорилгоо биелүүлсэндээ сэтгэгдэл өндөр байна. Ираны тамирчинтай финалд таарна гэдгээ гадарлаж байсан. Тиймээс багштайгаа ярилцаад зөв тактик боловсруулж, сэтгэлзүйн хувьд их тайван байлаа" гэж ярилаа.

У.Сүрэнжав паралимпаас алтан медаль хүртсэн анхны эмэгтэй тамирчин болсон билээ. Тэрбээр эмэгтэйчүүдийн 52 кг-ын жинд алтан медаль хүртсэн бол дэлхийн таван удаагийн аварга Г.Болор-Эрдэнэ эрэгтэйчүүдийн 63 кг-ын жинд мөнгөн медаль хүртсэн юм.

ФОТО