Б.Энхбаяр: Хараат бус ажиллахаар тангараг өргөсөн хүн УИХ-ын даргын зөвлөх болохоор шийдчихсэн, тохирчихсон гээд байна

ШЕЗ-ийн гишүүн Н.Отгончимэг

УИХ-ын Хууль зүйн байнгын хорооны өнөөдрийн хуралдаанаар Шүүхийн Ерөнхий Зөвлөл (ШЕЗ)-ийн гишүүн Н.Отгончимэгийн ажлаас чөлөөлөгдөх өргөдлийг авч хэлэлцжээ. 

Энэ үеэр ШЕЗ-ийн гишүүн Н.Отгончимэгээс байнгын хорооны гишүүн асуулт асуусныг хүргэж байна. 

УИХ-ын гишүүн Б.Энхбаяр: Одоогоос гурван жилийн өмнө шүүхийн хууль батлагдаж, Шүүхийн Ерөнхий Зөвлөл, Шүүхийн Сахилгын Хороо гэх Үндсэн хуулийн байгууллагуудыг нээлттэй ардчилсан зарчмаар томилж байсан.

Нэр дэвшүүлэх асуудлыг өмнө нь дарга хийдэг байсан бол өөрөө нэр дэвшиж өрсөлддөг болгосон. Энэ шалгуураар би чадна, шүүхийн хараат бус байдлын төлөө ажиллана гэж та сонгогдож байсан. Энэ бол таны асуудал биш. 

Учир нь УИХ-ын дөрвөн жилийн баталгаатайгаар томилогдсон Үндсэн хуулийн байгууллагын гишүүн юм. Энэ утгаараа таны дээр ямар ч дарга байхгүй. Ерөнхийлөгч, УИХ-ын дарга, гишүүд, Засгийн газар ч биш. Та хэнээс ч хараат бус ажиллана гээд тангараг өргөсөн хүн УИХ-ын даргын зөвлөх болохоор ярьчихсан гээд ороод ирэхээр чинь асуудал үүсэж байна. 

Нэг даргад үйлчилдэг албан тушаалаар ард түмний мандатыг сольё гээд би шийдчихсэн, тохирчихсон гээд байна. ШЕЗ-ийн гишүүн нь Ерөнхийлөгч, УИХ-ын дарга гишүүд, Засгийн газар гишүүд, Ерөнхий сайдтай уулзах ёсгүй. Хуулиараа ийм байгаа. Та уулзаад тохирчихсон, ажил албан тушаалын асуудал ярьчихсан гээд сууж байна.

ШЕЗ-ийн гишүүн Н.Отгончимэг: Б.Энхбаяр гишүүн миний үгийг гуйвуулахгүй байгаасай гэж хүсэж байна. Тохирчихсон асуудал байхгүй. Томилогдохын тулд өөр процесс байдаг. Санал тавьсан гэж би хэлсэн. Өөрийн хэмжээнд шийдлээ гаргасан учир өнөөдөр би өргөдлөө өгч байна. 

Яг үнэндээ ШЕЗ-ийн арван гишүүний бүрэн эрхийн хугацаа дөрвөн жил болоод дуусна. Үүний дараа энэ байгууллагын бодлогын залгамж халаа эргэлзээтэй байдалд хүрнэ. 

Бид үүнийг даван туулахын тулд ажлын албаа чадавхжуулаад явдаг. Та бүхэн чөлөөлөх шийдвэр гаргалаа гэхэд дараагийн хүн ирэхэд бүрэн эрхийн хугацаа дөрвөн жил байна. 

Миний хувьд үнэхээр том шийдвэр гаргасан. Би 26 жил хуулийн байгууллагад ажиллахдаа улс төрийн алба хашиж байгаагүй. Процесс цаашаа явбал би улс төрийн албанд анх удаа томилогдоно. Энэ бол амаргүй шийдвэр байсан.