Гэрэл зургийг MPA агентлагийн онцгой зөвшөөрөлтэйгөөр ашиглав

Бүгд Найрамдах Киргиз Улс (БНКУ)-ын аялал жуулчлалын боломж, чадамжийг сурталчлан таниулах "Tourism Road Show-2023" арга хэмжээтэй холбогдуулан тус улсын Элчин сайдын яамнаас “Blue Sky” зочид буудалд өнөөдөр уулзалт зохион байгууллаа. 

"Энэ онд Киргиз улсын 783 жуулчин Монголд зочилсон бол манай улсын 368 иргэн Киргиз улсад аялсан талаарх тоон мэдээлэл бий. 

Олон улсын аялал жуулчлалын "Lonely Planet" байгууллагын судалгаагаар ирэх онд гадаадын иргэд аялахад тохиромжтой, аялахыг хүсэж байгаа орнуудын тоонд Монгол Улс багтжээ.

Цаашид Монгол, Киргиз хоёр орны аялал жуулчлалыг хөгжүүлэхэд бидний хамтын ажиллагаа чухал" гэдгийг БОАЖЯ-ны Тусгай хамгаалалттай газар нутгийн бодлого зохицуулалтын газрын дарга Н.Баатарцогт ярилаа. 

"Монгол Улстай ах, дүүгийн найрамдалт харилцаагаа бэхжүүлэн хөгжүүлэхийг эрмэлзэж байна"

 

Гэрэл зургийг MPA агентлагийн онцгой зөвшөөрөлтэйгөөр ашиглав

БНКУ-аас Монгол Улсад суух Элчин сайд Айбек Артыкбаев хэлэхдээ "Киргиз, Монгол хоёр улсын ард түмэн олон мянган жилийн турш мөр зэрэгцэн амьдарч ирсэн түүхтэй.

Монгол Улстай ах, дүүгийн найрамдалт харилцаагаа бэхжүүлж, улам хөгжүүлэхийг эрмэлзэж байгаа. Эдүгээ Киргиз улсад 80 гаруй ястан, үндэстний төлөөлөл энх тайван, эв найрамдалтай амьдарч байна.

Манай улс олон талт гадаад бодлогоороо дамжуулан олон улсын бүх түнш улстай харилцан ашигтай харилцааг хөгжүүлэхэд чиглэсэн үр бүтээлтэй хамтын ажиллагааг хөгжүүлэх сонирхолтой байгаа" хэмээв. 

Дотоодын аялал жуулчлалын тоон мэдээг БОАЖЯ-наас хүргэсэн юм. Үүнийг тодруулбал: 

• Цар тахлын өмнө Монголд ирэх жуулчдын тоо 777,000 орчим байсан бөгөөд аялал жуулчлалаас ДНБ-д оруулах хувь нэмэр нь 607 сая ам.доллар байжээ.
• Тэгвэл дээрх үзүүлэлтийг Монголд зочлох жилийн хүрээнд нэмэгдүүлснээр өнөөдрийн байдлаар манай оронд 600,000 орчим жуулчин ирж, нэг тэрбум ам.долларыг оруулаад байгааг хэлэв. 

Аялал жуулчлалын бодлогын талаар БОАЖЯ-ны Тусгай хамгаалалттай газар нутгийн бодлого зохицуулалтын газрын дарга Н.Баатарцогт ярьсан юм. 

Тэрбээр "Сүүлийн жилүүдэд Монгол, Киргиз улсын харилцаа идэвхжиж, энэ онд Киргиз улсын ерөнхийлөгч манай улсад төрийн айлчлал хийсэн.

Мөн Монгол Улсын Ерөнхий сайд БНКУ-д ажлын айлчлал хийсэн билээ. Энэ жил хоёр улсын уламжлалт найрсаг харилцааг гүнзгийрүүлэн хөгжүүлэхэд чухал хувь нэмэр оруулахуйц үйл явдлуудаар дүүрэн байлаа.

Дээрх өндөр хэмжээний уулзалт айлчлалуудын үеэр хоёр улсын аялал жуулчлалын салбарт хамтран ажиллах яриа хэлэлцээр хийгдсэнээр өнөөдрийн бидний оролцож байгаа "Tourism Road Show" арга хэмжээ өрнөж байна.

Монгол Улсад зохион байгуулагдсан “Нүүдэлчин” олон улсын фестивальд Киргиз улсаас 11 уран бүтээлч хүрэлцэн ирж оролцсон нь хамгийн олон уран бүтээлчийг илгээсэн орнуудын тоонд орж байгааг энд цохон тэмдэглэе.

Хоёр улсын нүүдлийн соёл иргэншил, мал аж ахуй, хувцас хэрэгсэл, хоол хүнс гэх мэтчилэн ёс заншлын хувьд адил төстэй олон зүйл бий.

Азид хөх толботой төрдөг цөөн хүмүүсийн нэг. Энэ үүднээс Бишкек-Улаанбаатар-Сөүл чиглэлд “Хөх толботон” нэртэй аялал жуулчлалын шинэ маршрутыг нээхээр ажиллаж байна" гэдгийг хэллээ.