С.Чинзориг: Томуугийн дэгдэлт хичээл, сургууль болон олон нийтийг хамарсан үйл ажиллагааг хязгаарлах хэмжээнд хүрээгүй

Гэрэл зургийг MPA агентлагийн онцгой зөвшөөрөлтэйгөөр ашиглав

УИХ дахь МАН-ын бүлгийн хурлаар хэлэлцсэн асуудлын талаар өнөөдөр хэвлэлийн хурал зохион байгууллаа.

Энэ үеэр томуугийн өвчлөлийн талаар С.Чинзориг "Томуу, томуу төст өвчний тархалтыг таван үе шатаар авч үздэг. Одоогийн байдлаар томуугийн дэгдэлт идэвхжлийн буюу хоёр дахь шатанд байна.

Амбулаторийн үзлэгийн 5.5%-ийг томуу, томуу төст өвчин эзэлж байгаа.

Томуугийн тархалт идэвхжлийн түвшинд байгаа учир хичээл, сургуулийн амралтыг өөрчлөх, олон нийтийг хамарсан үйл ажиллагааг хязгаарлах нөхцөл байдал үүсээгүй.

300,000 хүн тун томуугийн вакциныг хүүхэд, жирэмсэн эх, өндөр настан зэрэг эрсдэлт бүлгийн хүн амын 89.8% вакцинжуулалтад хамрагджээ.

Томуугийн дэгдэлт нэмэгдвэл ашиглах зориулалтаар нийслэлийн есөн дүүргийн эмнэлэгт 297, Цэргийн төв эмнэлэг, Төрийн тусгай албан хаагчдын эмнэлэг 575 ор дэлгэсэн.

Эрүүл мэндийн байгууллагуудад эм тариа тасалдаагүй, эмнэлгүүд 30 хоногийн эм, тарианы нөөцтэй байна" гэв.

Өнөөдрөөс амбулаторийн тусламж үйлчилгээг уртасгасан цагаар үзүүлж эхэлжээ. Мөн өрхийн эмнэлгүүдийг амралтын өдрүүдэд уртасгасан цагаар ажиллуулахаар болсон байна.

ЭХЭМҮТ, Яармагийн 300 ортой эмнэлэгт резидент эмч нар болон АШУИС-ийн төгсөх курсийн 90 оюутанд, хоол, унааны зардлыг өгч туслахаар ажиллуулж байгааг тэрбээр хэллээ.