“Монголоос захиалга өгөхөд манай үйлдвэр автобусаа богино хугацаанд хийсэн болохоор алдаа гаргаснаа хүлээн зөвшөөрч байна"

Гэрэл зургийг MPA агентлагийн онцгой зөвшөөрөлтэйгөөр ашиглав

Zyle Daewoo Bus компаниас нийлүүлсэн автобусны талаар тус компанийн удирдлага өнөөдөр "Тэнүүн-Огоо" ХХК-ийн байранд хэвлэлийн хурал хийж, мэдээлэл өглөө.

"Zyle Daewoo Bus" корпорацын дэд ерөнхийлөгч Ким Ки Ёл "БНСУ, "Daewoo" корпорацаас Монгол Улсын иргэд, Ерөнхий сайд, Засгийн газраас уучлалт гуйж байна.

Наашаа ирэх замдаа хуучин Daewoo автобус явж байгааг өөрийн нүдээр харсан. Анх 400 ширхэг автобус оруулж ирэх гэрээнд гарын үсэг зурсан хүн нь би байна. 12, 13 жилийн дараа эдгээр автобус Монгол Улсын зам дээр явж байгааг би гайхсан, сэтгэл хөдөлсөн.

КОВИД-19 цар тахлаас болж, дэлхийн автобусны үйлдвэрүүд зогсолтод орсон. Манай компани ч нэлээд хүнд байдалд орсон. Дэлхий нийт, ард иргэд энгийн байдалдаа ороход бид Катар, Саудын Араб, Ирак, Судан улсад автобус нийлүүлэх гэрээ хийх шийдвэрээ гаргасан. 

Одоогийн байдлаар "Тэнүүн-Огоо" компанийн захирал Ганхуягтай миний бие Монгол Улсад 600 шинэ автобус нийлүүлэх гэрээг хийж, энэ төслийг эхлүүлсэн байгаа юм.

Сүүлд гэхэд бид Арабын Эмират улстай гэрээ хийгээд туршилтын нэг автобус явуулахад, дахиад 100 автобус шаардсан байгаа. ОХУ-ын томоохон хотуудад 500 ширхэг автобус явуулдаг.

Миний зүгээс Монгол Улстай гэрээ хийж байгаа нь манай компани цаашаа ОХУ зэрэг хойд улсуудтай хамтарч гэрээ хийгээд автобусаа явуулна гэдэгт итгэлтэй байгаа.  

Монголын цаг агаарын нөхцөл байдал ОХУ-тай төстэйг би өөрөө анзаарсан.

Монгол Улс манай компани, БНСУ-тай нөхөрлөлийн харилцаатай байдаг. Өмнө нь автобус нийлүүлж байсан болохоор шинэ автобусыг 30%-ийн хөнгөлөлттэй үнээр өгч байгаа.

Монголоос захиалга өгөхөд манай үйлдвэр богино хугацаанд хурдан хийсэн болохоор жижиг алдааг гаргаснаа хүлээн зөвшөөрч байна. Гэхдээ том алдаа биш.

Сүүлийн хоёр өдөр сошиал ертөнцөөс муу мэдээ сонссон. Үүнийг хуурамч мэдээ гэж хэлж байна.

Бидний харсан өөр нэг худал мэдээлэл нь автобусны арлын дугаар буюу VIN number шалгаж үзэхэд 30 жилийн настай гарч ирсэн гэдэг мэдээллийг хараад шоконд орсон. Манай компани БНСУ-ын хуулийн дагуу арлын дугаарыг үйлдвэрлэсэн автобус дээрээ суурилуулдаг учир энэ нь худал юм.

Оруулж ирсэн автобус нь гар дамжсан, хуучин автобус гэсэн мэдээллийг уншаад их цочирдсон. Монгол Улсын иргэдийн үзэл бодол өөр байж магадгүй. Манай байгууллагын хувьд 2012 онд гаргасан дөрвөлжин загвартай автобус нь удаан тэсэх чадвартай гэж үздэг.

Daewoo корпорац олон улсад охин компани ихтэй. Тэдний нэг нь Казахстан улсад байдаг. Казахстан дахь Daewoo корпорацын салбар уг автобусыг Монголд хямд үнээр борлуулж чадна гэсэн хуурамч мэдээлэл явж байсан. Манай корпорац дээрээсээ бүх зүйлээ хариуцдаг, шат дараалалтай явдаг. Казахстаны салбар бидэнтэй хэлэлцэхгүйгээр Монгол Улсад автобус нийлүүлэх боломжгүй.

Манай компани чанарыг эрхэмлэдэг. Автобус чанартай байх тусам удаан хэрэглэгдэнэ.

"Тэнүүн-Огоо" компанийн захирал Ганхуяг манай үйлдвэрт шинэ дэлгэц, нэмэлт халаалт, АС суурилуулах шаардлагыг тавьсан. Энэ бүгдийг автобусандаа хийгээд явуулсан.

Орж ирсэн автобуснаас хар утаа их ялгарсан гэдэг мэдээлэл нь хуурамч. Монголын дизель түлшний чанар муу болохоор эхэндээ хар утаа гарахыг үгүйсгэхгүй, яваандаа зүгээр болно. Үүнийг бид баталж байна" хэмээн ярилаа.