ИНФОГРАФИК: Манай дэлхий ердөө 100 ХҮН-тэй гэж бодвол...

Нэгдсэн Үндэстний Байгууллагаас (НҮБ) дэлхийн нийт хүн ам 2022 оны арваннэгдүгээр сарын 15-ны өдөр 8 тэрбумд хүрснийг зарласан билээ. 

Хүн төрөлхтөн 7 тэрбумаас 8 тэрбум болтлоо 11 жилийн хугацааг зарцуулсан ба хүн амын энэхүү огцом өсөлтөд Хятад, Энэтхэг тэргүүтэй Ази тивийн орнууд голлох нөлөө үзүүлсэн байна.

Түүнчлэн дэлхийн хүн амын тоо дараачийн 30 жилд ойролцоогоор 2 тэрбумаар өснө гэсэн тооцооллыг НҮБ-аас гаргасан бөгөөд 2050 онд 9.7 тэрбум, 2080-аад оны дунд үед оргилдоо хүрч 10.4 тэрбум болно гэжээ. 

Өнгөрсөн дөрөвдүгээр сард нийтлэгдсэн НҮБ-ын Хүн амын сангийн тайланд энэ оны дунд үе гэхэд Энэтхэгийн хүн ам Хятадын хүн амыг давж, дэлхийн хамгийн их хүн амтай улс болно гэсэн тооцоог гаргажээ. Тайланд дурдсанаар зургаадугаар сарын сүүлээр Энэтхэгийн хүн амын тоо 1.4286 тэрбум болох бол Хятад улсын хүн амын тоо 1.4257 тэрбумд хүрэх төлөвтэй аж. 

Тэгвэл 8 тэрбум хүнтэй дэлхий маань ердөө 100 хүнтэй байсан бол ямар байх байсныг инфографикаар хүргэж байна. 

Манай дэлхий 100 хүнтэй байсан бол Энэтхэгийн 18, Хятадын 18, Америкийн 4, Индонез, Пакистан, Нигери, Бразилын тус бүр 3, Бангладеш, Орос, Япон, Мексик, Этиоп улсуудаас тус бүр 2, Филиппин, Египет, Ардчилсан Конго, Вьетнам, Иран, Турк, Германы тус бүр 1, үлдсэн нь бусад улсын 31 иргэнтэй байх байжээ. 

Харин шашин шүтлэгийн хувьд манай дэлхий 100 хүнтэй байсан бол хамгийн их нь буюу 31 хүн Христийн шашин шүтдэг, 7 хүн Буддын шашинтай, 16 хүн шашин шүтдэггүй байх байжээ. 

Тивээр нь ангилж үзвэл 100 хүний 60 нь Ази, Номхон далайн бүс нутагт, 16 хүн Африкт, 10 хүн Европт, Хойд, Өмнөд Америк тивд нийлээд 14 хүн амьдрах байв. 

Эх сурвалж: United Nations, World of Statistics