Б.Энхбаяр: ТЭДС-гийн 50 хувийг манай нэг хөдөлмөрийн баатар 14 компаниараа дамжуулан хүртсэнийг хэлж байсан

Гэрэл зургийг MPA агентлагийн онцгой зөвшөөрөлтэйгөөр ашиглав

Засгийн газрын тусгай сангийн тухай хуулийг УИХ өнөөдөр хэлэлцлээ. Уг хуулийн төсөлд Хөдөө аж ахуйг дэмжих санг татан буулгаж, төрийн өмчит корпорац байгуулах асуудлыг тусгасан байв. 

Хэлэлцэж буй асуудалтай холбоотойгоор УИХ-ын гишүүн Б.Энхбаяр "Тариалан эрхлэлтийг дэмжих сангийн 50 хувийг манай нэг хөдөлмөрийн баатар 14 компаниараа дамжуулан хүртэж байсан талаар Ч.Хүрэлбаатар сайд УИХ-ын чуулганы хуралдааны үеэр ярьж байсан. Шалгалтын дүнгээ олон нийтэд ил болгоогүй. Тухайн үед Сангийн яамнаас шалгаж, Засгийн газарт танилцуулсан байх. Энэ асуудал ер нь юу болж дууссан бэ? 

Ноолуур, гурил, газар тариалангийн хөтөлбөрийн зээлээр эрх мэдэлд ойр хүмүүсийн хамаарал бүхий компаниудад давуу байдал олгодог нь тодорхой болж байна. Засгийн газрын хөтөлбөрүүд бүгд дэмжих гэдэг гоё үгтэй. Сайхан сэтгэлийн үзүүрт шар тос биш атга хар юм байна гэдэг нь тодорхой болж байгаа. 

Хөдөө аж ахуйг дэмжих санг татан буулгаж, төрийн өмчит корпорац байгуулна гэдэг нь ямар учиртай юм болох гээд байна вэ? Хөдөө аж ахуйг дэмжихээр яам дэргэдээ компани байгуулж байгааг ойлгохгүй байна. Ашгийн төлөө юм чинь хөдөө ахуйн бизнес эрхлэгч нартайгаа өрсөлдөнө гэж харж байгаа. Төр тэд нартай өрсөлдөж яах гээд байгаа юм бэ? 

Хөгжлийн Банкны сонсголын үеэр харж байхад "Алтан тариа" компанийн захирал П.Цэнгүүнээс өөр төрийн дэмжлэггүйгээр ажиллаж байгаа хүн байхгүй юм билээ. Бизнесийн чөлөөт өрсөлдөөнийг нухчин дараад байна. Гурав, найман хувийн зээлтэй хүмүүстэй яаж 10, 20 хувийн зээлтэй бизнес эрхлэгч өрсөлдөх вэ? Төр өөрөө нухчин дарж байгаа юм. 

Х.Баттулга Ерөнхийлөгчийг Хүнс, хөдөө аж ахуйн сайд байхад 260 тэрбум төгрөгийг Голомт банкаар дамжуулан зээлсэн байсан. Сайдынх нь тушаалаас өөр нэг ч материал ХХААХҮЯ-нд байхгүй гэж гарч ирсэн" хэмээв. 

Харин ХХААХҮ-ийн сайд Х.Болорчулуун "Хөдөө аж ахуйг дэмжих санг татан буулгаж, төрийн өмчит корпорац болсноор бие даасан үйл ажиллагаа явуулах боломж бүрдэнэ. Хөдөө аж ахуйн үйлдвэрлэл эрхлэгч нарын үйл ажиллагаанд дэмжлэг үзүүлнэ. Мөнгөн хуримтлал нэмэгдэж, төлбөрийн чадвар дээшилнэ. 

Сая мөнгө угаалт болсон юм биш үү, зарим компаниуд өр үүсгэсэн гэж байна. Хөдөө аж ахуйг дэмжих сангийн авлага, өглөг 200 орчим тэрбум төгрөгт эргэлдэж байна. Корпорац болсноор энэ байдал өөрчлөгдөнө" гэдгийг хэллээ.