"Эрчим хүчний хэмнэлт бий болгох зорилготой төслийн хүрээнд 50-60 угсармал барилгыг дулаалж, засварлана"
ХБНГУ-ын “НАМА Фасилити” байгууллага, Барилга, хот байгуулалтын яам, Улаанбаатар хотын Захирагчийн ажлын алба хамтран нийслэл дэх угсармал орон сууцны дулаан алдагдлыг бууруулах “Улаанбаатар хотын орон сууцны эрчим хүчний үр ашгийг дээшлүүлэх нь” төслийг хэрэгжүүлж буй.
Энэ хүрээнд төслийн түнш байгууллагууд болох БХБЯ, УБЗАА, Германы олон улсын хамтын ажиллагааны нийгэмлэг (GIZ) нар хэрэгжүүлэлтийн гэрээ байгуулжээ. Мөн Төслийн удирдах хороо 2023 оны үйл ажиллагаа, санхүүгийн төлөвлөгөөг батлав.
Энэ үеэр Улаанбаатар хотын Ерөнхий менежер бөгөөд Захирагчийн ажлын албаны дарга М.Баяраа “Угсармал барилгын дулаан алдагдлыг бууруулах төсөл нь шинжлэх ухааны үндэслэл сайтай, өргөн цар хүрээг хамарсан, техник технологийн ухаалаг шийдлийг ашигласан онцлогтой, чухал төсөл. Төслийг хэрэгжүүлэхэд байгууллагууд уялдаа холбоотой ажиллах хэрэгтэй. Уг төсөл богино хугацаанд, үр дүнтэй хэрэгжинэ гэж найдаж байна” хэмээсэн юм.
Нийслэлийн хэмжээнд угсармал барилгуудад дулаан, техникийн шинэчлэл хийх “Улаанбаатар хотын орон сууцны эрчим хүчний үр ашгийг дээшлүүлэх нь” НАМА дэмжлэгт төсөл 2026 он хүртэл хэрэгжинэ. Энэ хугацаанд нийт 375 барилгыг дулаалж, засварлахаар төлөвлөжээ.
Барилга байгууламжийн дулаан алдагдлыг бууруулж, эрчим хүчний хэмнэлт, үр ашиг бий болгох зорилготой уг төслийн хоёр дахь үе шат 2023 оны сүүлчээр эхэлж, 50-60 угсармал барилгыг сэргээн засварлах аж.
Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
6 СЭТГЭГДЭЛТЭЙ
|
