"БНСУ-ын профессорын баг манай улсад ажиллаж байна"
Дэлхий дахинд тархсан коронавируст /КОВИД-19/ халдвар буурахгүй байгаагаас эмч мэргэжилтнүүдийн ажлын ачаалал ихээр нэмэгдсэнээс гадна гадаад орнууд хилээ хаасан байдалтай байгаагаас эрүүл мэндийн ажилтнууд гадаадын өндөр хөгжилтэй орнуудад сургалтад хамрагдан мэдлэг, чадвараа нэмэгдүүлэх боломж хаагдсан байна.
Иймд эмнэлгийн мэргэжилтний тасралгүй суралцах, мэдлэг мэргэжлээ дээшлүүлэх хэрэгцээг хангахын тулд, эмнэлгийн тусламж үйлчилгээг алдагдуулахгүйгээр туршлага солилцон, мэргэжлийн сургалт зохион байгуулахаар ЭМХТ-өөс БНСУ-аас профессорын багийг эх орондоо урьжээ.
Түүнчлэн туршлагаа хуваалцан, ажлын байрны эмнэл зүйн сургалтууд зохион байгуулж, эмчилгээ, оношилгоо хийх юм.
2021 оны 10 дугаар сарын 29-ний өдөр профессор Ким Сан Хён, Улсын нэгдүгээр төв эмнэлгийн эмч нартай хамтран ходоодны мэс засалд амжилттай оролцлоо.
Харин маргааш буюу 10 дугаар сарын 30-ны Бямба гарагт Коронавируст (Ковид-19) халдварын үеийн батлагдсан тохиолдолд үзүүлэх эх нярайн тусламж, үйлчилгээний чанар, хүртээмжийг нэмэгдүүлэх зорилгоор “Коронавируст (КОВИД-19)-ын халдварын үеийн эх нярайн тусламж үйлчилгээ” сэдэвт цахим сургалтыг профессор Хан Вүн Хо, Чой Гү Ёон нар зохион байгуулах гэж байна хэмээн ЭМЯ-наас мэдээллээ.
