Т.Ням-Очир: Улсын хэмжээнд 245 сургуулийн 43 мянга гаруй сурагч цахим хэлбэрт шилжээд байна
БШУЯ-ны Бага, дунд боловсролын газрын дарга Т.Ням-Очир цаг үеийн асуудлаар мэдээлэл өглөө.
Тэрбээр "Хичээлийн шинэ жил эхэлснээс хойш гурван удаа буюу есдүгээр сарын 1, 3, 10-нд үндэсний хэмжээний тандалт судалгааг хийгээд байна.
Эхний мэдээллээр есдүгээр сарын 1-нд ерөнхий боловсролын сургуулиудын 88.8 хувь нь ямар нэгэн хэлбэрээр хичээлээ эхлүүлсэн байсан. Хичээлээ эхлүүлсэн сургуулиудын 21.2 хувь нь танхимаар, 78.8 хувь нь 5/9 зарчмаар хичээллэж эхэлсэн. Нийт сургуулийн 11.2 хувь буюу 94 сургууль тодорхой хугацаанд бүрэн цахимаар хичээллэх зохицуулалтыг холбогдох онцгой комиссоос гаргасан байна.
Харин есдүгээр сарын 10-ны байдлаар нийт 205 сургуулийн 86 мянган сурагч танхимаар, 5/9 зарчмаар 552 сургуулийн 519 мянга орчим сурагч хичээллэж байгаа мэдээлэл ирлээ.
Суралцагчдад зайн хэлбэрээр суралцах эрхийг олгосон бөгөөд есдүгээр сарын 3-ны байдлаар 29 мянга орчим суралцагч, 10-ны байдлаар 33 мянган суралцагч зайн хэлбэрээр суралцах хүсэлт гаргалаа.
Есдүгээр сарын 12-ны байдлаар коронавируст халдвараар өвчилсөн хүмүүсийн 19.5 хувийг 0-18 насны хүүхэд эзэлж байгаа нь энэ сарын 1-ний өдөртэй харьцуулахад 0.3 хувиар буурсан үзүүлэлт юм. Өөрөөр хэлбэл хичээл сургалтын үйл ажиллагаа эхэлсэнтэй холбоотойгоор 0-18 насны хүүхдийн өвчлөл нэмэгдээгүй гэсэн үг" хэмээн хэллээ.
КОРОНАВИРУСТ ХАЛДВАРЫН ТООН МЭДЭЭЛЭЛ:
- Есдүгээр сарын 1-ний өдрийн байдлаар коронавируст халдвараар өвчилсөн 0-18 хүртэлх насны 43,135 хүүхэд байгаа нь нийт 217,741 тохиолдлын 19.8%-ийг эзэлж байна.
- Есдүгээр сарын 12-ны өдрийн байдлаар коронавируст халдвараар 0-17 насны 696 шинэ тохиолдол бүртгэгдэж, нийт 51,843 тохиолдол болсон. Энэ нь нийт тохиолдлын 19.5%-ийг эзэлж байна. Тоон мэдээллээс харахад хичээлийн үйл ажиллагаа танхим, танхимын бус хэлбэрээр эхэлснээс хойш халдварын тохиолдол нэмэгдээгүй байна.
Улсын хэмжээнд Ковид-19-ийн эсрэг вакцины хамрагдалтыг авч үзвэл 12-15 насны хүүхдүүдийн 89 хувь нь нэгдүгээр тунд, 76 хувь нь хоёрдугаар тундаа хамрагджээ.
