Коронавирусийн халдварын улмаас өнөөдрийн байдлаар нийт 5,802 хүн эмнэлэгт хэвтэн эмчлүүлж байгаа бол 5,349 хүн гэрийн хяналтад эмчлэгдэж байгааг ЭМЯ-наас мэдээллээ. Өөрөөр хэлбэл, 11,151 хүн халдварын улмаас эмчлүүлж байна.
Эмнэлэгт хэвтэн эмчлүүлж байгаа 5,802 иргэний 3,430 буюу 60% нь хөнгөн байгаа бол үлдсэн 40% нь хүнд байгаа юм. Тэр дундаа маш хүнд хүний тоо 132 болж өнгөрсөн нэг хоногийн хугацаанд 10-аар нэмэгдсэн байна.
Зургаадугаар сарын 2-ноос эхлээд нэг хоногт бүртгэгдэх халдварын тохиолдол 1,000-аас буухгүй байгаа бөгөөд нас баралт өндөр хэвээр байгаа.
Энэ долоо хоногт 7,700 орчим тохиолдол шинээр батлагдсаны дийлэнх нь эмнэлэгт хэвтэн эмчлүүлж байгааг ЭМЯ-ны хэвлэлийн төлөөлөгч Б.Ууганбаяр хэлсэн. "Нэг хүний цаана 2-3 хүн халдвар авах эрсдэлтэй. Энэ долоо хоногт шинээр өвчилсөн хүмүүсийн цаана 20,000 гаруй хүн эрсдэлтэй байгаа гэсэн үг" гэдгийг мөн тайлбарлав.
ВИДЕО: