Хуулиа мөрддөггүй Хууль зүйн сайд асан Ц.Нямдоржийн тээврийн хэрэгслийн ЗӨРЧЛҮҮД

A.Жаргал

2021 оны 4 сарын 16

iKon.MN

Гэрэл зургийг MPA.mn

Хууль зүйн сайд асан, ЗГХЭГ-ын дарга Ц.Нямдорж замын хөдөлгөөний дүрэм зөрчсөн бичлэг олон нийтийн сүлжээнд ил болов.

Тэрбээр "УБҮ 0052" дугаарын Lexus маркийн машинтай Хан-Уул дүүрэгт явж байхдаа явган зорчигч руу шавхай цацсаныг иргэн Бат-Эрдэнэ баримтжуулж авчээ.

Сайд асан Ц.Нямдорж
-Машин барихдаа бүсээ зүүдэггүй
-Маскаа зөв зүүдэггүй
-Дугаарын хязгаарлалттай өдөр чөлөөтэй явдаг
-Явган намайг шавхайтай усаар будчаад би мэдсэнгүй уучлаарай гэх
-Бичлэг хийхээс өмнөх авир нь бол тун эвгүй
-Өөрсдөө хуулиа ингэж мөрддөг
RT хийгээд өгөөрэй! 🙌 pic.twitter.com/T6L5JE6VVZ
— Батка (@baterdene_a) April 16, 2021

Бичлэгт харагдаж байгаагаар Ц.Нямдорж машин барихдаа бүсээ зүүгээгүй, амны хаалтаа зөв зүүгээгүй байна.

Энэ талаар Mashinii Zar | Машины Зар гэх фэйсбүүк группт Энхбат Ээгий хэмээн хаягнаас мөн пост оруулжээ. Постыг ЭНД дарж үзнэ үү.

Иргэдээс гаргасан мэдээллийн дагуу Ц.Нямдоржийн мэдээллийг шалгалаа.

НЭГ. Автомашины улсын дугаарыг сольсон уу?

Smartcar.mn сайтаар орж "УБҮ 0052" улсын дугаараар шалгавал дараах илэрц гарч байна.

Зураг1: 0052 УБҮ дугаартай машины мэдээлэл

Энэхүү мэдээллээр бол "УБҮ 0052" улсын дугаар нь Lexus биш Land Cruiser 200 маркийн автомашины дугаар болох нь харагдаж байна.

ХОЁР: Оношилгоонд тэнцээгүй

Түүнээс гадна "УБҮ 0052" улсын дугаартай тээврийн хэрэгсэл нь оношилгоондоо тэнцээгүй болохыг дараах илэрц харуулав.

Зураг 2: 0052 УБҮ дугаартай машин оншилгоонд тэнцээгүй

ГУРАВ. Торгуулиа огт төлж байгаагүй

Тухайн улсын дугаар дээр үүссэн торгуулийн хэмжээг тооцож үзвэл 732,800 төгрөг болж байна.

Зураг 3: 0052 УБҮ дугаартай машины торгууль 732'800₮ байна

Өөрөөр хэлбэл, 2016 оны аравдугаар сарын 21-нээс хойших торгууль төлөгдөлгүй явсаар ийнхүү хуримтлагджээ. Тухайн үед Ц.Нямдорж нь Хууль зүй, дотоод хэргийн сайдын албан тушаал хашиж байсан байна.

Уг албан тушаалд томилогдсоныхоо дараа "УБҮ 0101" гэх улсын дугаартай Lexus маркийн автомашин унах болсон нь олон нийтийн дунд шуугиан тарьж байсан юм. Тэгвэл сайд асан Ц.Нямдорж Lexus маркийн автомашинд Land Cruiser 200-ийн дугаар зүүж явахдаа дээр дурдсан олон зөрчил гаргасан нь ил болов.

Замын хөдөлгөөний дүрэм зөрчсөн жолооч нарын торгуулийн хэмжээ, төлөлтийн явцын талаар бид өмнө нь мэдээлсэн.

Энэ талаар Замын хөдөлгөөний төлөвлөлт, зохицуулалт, инженерчлэлийн газраас "Улсын хэмжээнд 4.5 сая ширхэг торгууль огт төлөгдөөгүй байна. Үүнээс 63 мянган жолооч 10-аас дээш удаагийн торгуультай байгаа бөгөөд хамгийн их торгууль хуримтлуулсан хүнийх ₮8 сая төгрөгтэй тэнцэж байна. Мөн нийт жолооч нарын 44 хувь нь улсын үзлэг оношилгоонд хамрагдахгүй замын хөдөлгөөнд оролцдог" гэсэн мэдээллийг өгсөн юм. Эдгээр зөрчилтэй жолоочийн нэг нь ЗГХЭГ-ын дарга Ц.Нямдорж байна.

Тээврийн цагдаагийн албанаас "Бэлэн бус хэлбэрээр торгууль оногдуулах журмын 4.1-д зөрчил гаргасан этгээд нь оногдуулсан торгуулийг 15 хоногийн дотор шийтгэлийн хуудсанд заасан тухайн дансанд төлөх үүрэгтэй гэж заасан.

Харин эдгээр жолоочоос торгуулиа төлөөгүй зөрчилтэй тээврийн хэрэгслийг замын хөдөлгөөнд оролцуулахад нь хязгаарлалт хийхийг холбогдох албаныханд өнгөрсөн онд Нийслэлийн Засаг дарга бөгөөд Улаанбаатар хотын захирагчийн үүрэг гүйцэтгэгч асан Ж.Батбаясгалан үүрэг болгож байв. Харамсалтай нь тухайн шийдвэр хэрэгжээгүй бөгөөд 4.5 сая ширхэг торгууль төлөгдөөгүйг дээр дурдсан. Мөн энэ хэрээр замын хөдөлгөөний ачаалал ч буураагүй хэвээр байна" гэдгийг учирласан юм.

Анхааруулга

Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!