АНУ-д сүүлийн нэг сар 180 мянга орчим хүүхэд COVID-19-өөр өвдсөн нь өмнөх сартай харьцуулахад 90%-аар өссөн үзүүлэлт болжээ

Эрүүл мэндийн яамнаас коронавирусийн халдварын талаар мэдээлэл хийх үеэр дэлхийн улс орнуудад өвчлөл ямар байгааг танилцуулсан юм.

Тодруулбал, сүүлийн 24 цагийн хугацаанд Энэтхэгт 53, АНУ-д 48, Бразилд 22 мянган хүн коронавирусийн халдварыг шинээр авжээ. Мөн ОХУ-д тус хугацаанд 5,118 хүн халдвараар өвчилж, 70 хүн эндсэн байна. Харин БНХАУ-д 115 тохиолдол бүртгэгдсэний 31 нь гадаад улсаас зөөвөрлөгдсөн тохиолдол байсан аж. Түүнчлэн Япон, БНСУ-д халдвар авсан хүний тоо нэмэгдсээр байгааг ЭМЯ-ны Олон нийттэй харилцах, тандалт шуурхай удирдлагын хэлтсийн дарга Д.Нарангэрэл онцолсон билээ. 

Түүнчлэн дэлхийн эрдэмтэн судлаачид 13 улс, бүс нутаг дэвсгэрийн 108 голомтод 65 удаагийн тойм судалгаа хийхэд коронавирусийн халдвар ихэвчлэн

1. Гэр бүлийн хүрээнд
2. Олон нийтийн газар
3. Худалдаа үйлчилгээ
4. Шашны байгууллага
5. Хурал зөвлөгөөний үеэр тархаж байгаа нь ажиглагдсан байна.  

Манай иргэдийн дунд ойлгож, илүү анхаарах шаардлагатай нэг асуудал байгааг Д.Нарангэрэл эмч мөн хэлсэн юм.

Тэрбээр “АНУ-д сүүлийн нэг сар 180 мянга орчим хүүхэд COVID-19-өөр өвдсөн нь өмнөх сартай харьцуулахад 90%-аар өссөн үзүүлэлт болжээ. Иймд АНУ-ын хүүхдийн эмч нарын академи болон хүүхдийн эмч нарын холбооноос “Хүүхэд коронавирусийн халдвараар өвчлөхгүй” гэх ташаа мэдээллээс ангид байж, хүүхдэдээ илүү анхаарал хандуулан, асаргаа сувилал хийхийг сануулсан” гэв.

ВИДЕО ҮЗЭХ: